Ir al contenido

Administrador d'Infraestructuras Ferroviarias

De Biquipedia
Versión d'o 21:08 17 set 2023 feita por Jpbot (descutir | contrebucions)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Plantilla:Ficha d'interpresa L'Administrador d'Infraestructuras Ferroviarias (en castellano y oficialment Administrador de Infraestructuras Ferroviarias), tamién conoixiu por l'acronimo Adif, ye una entidat publica empresarial espanyola, que pende d'o Ministerio de Fomento, y s'encarga de l'administración y construcción d'as linias de ferrocarril d'o país.[1]

L'Adif se formó l'1 de chinero de 2005 como consecuencia d'o dispuesto en a Lei d'o Sector Ferroviario, sinyada lo 18 de noviembre de 2003, en a cual se descomponeba l'antiga interpresa publica RENFE en Renfe Operadora y Adif. Dende l'1 de chinero de 2013 Adif administra tamién o rete ferroviario d'amplo metrico que no yera transferiu ta las comunidaz autonomas, producto d'a descomposición de l'antiga FEVE.[2]

Como hereua de RENFE y de FEVE, Adif ye actualment a propietaria y administradera d'a mayoría de linias ferrias de l'Estau espanyol. O 31 d'aviento de 2015 administraba 15.384 kilometros de vía y 1903 estacions, d'as cuals 41 por a suya filial Adif AV.[3]

Creyación

Adif se creya l'1 de chinero de 2005 y ye fruito d'a Lei d'o Sector Ferroviario de 2003 (Lei 39/2003), que sirvió pa transposar as Directivas europeas que conduciban a que as interpresas ferroviarias nacionals d'os estaus miembros deseparasen l'administración d'a infraestructura contra la operación d'os trens que i circulan, y en o medio u largo plazo permitisen a competencia d'interpresas privadas con os nuevos operadors nacionals.

Espanya, que alavez a gubernaba o PP en mayoría absoluta, fizo una interpretación mas restrictiva d'o que marcaba a directiva comunitaria que atros países como Alemanya y Francia, y escindió en dos a suya interpresa nacional, RENFE, creyando un operador ferroviario publico (Renfe Operadora) y un administrador d'infraestructuras, Adif, que son sociedaz de tot independients, mientres que en os atros países europeus as estructuras d'alta dirección continan estando compartidas y a división afecta principalment a las cuentas.

L'edificio de l'Avenida Ciudad de Barcelona Nº 2 de Madrit, que ye la seu central d'as oficinas de l'Adif. Edificio chermano con o Nº 8 d'a mesma avenida, seu de Renfe Operadora.

En virtut d'a Lei d'o Sector Ferroviario, a interpresa publica RENFE quedó deseparada en 2005 en:

  • Renfe Operadora; matriz de l'actual Grupo Renfe (dende 2014), operador ferroviario publico que preneba en herencio os trens y s'encargaba de fer-los circular, mesmo en competencia con atras interpresas ferroviarias.
  • Adif: propietario d'a infraestructura y chestor, que proporciona os suyos servicios a cualsiquier operador que le'n solicite.

Ixa división teneba bellas peculiaridaz, como que a venda de billez en as estacions quedase a cargo de l'Adif bel tiempo y que as estacions que nomás prestan servicio de Cercanías as administra Renfe Operadora, porque os servicios de Cercanías en Espanya se considera que tienen obligación de servicio publico[4] y se richen por os Contractos-Programa entre Estau y Operadora, por o que dica l'inte son exceptuaus de cumplir con a libre competencia.[5]

Incorporación de FEVE

L'1 de chinero de 2013 se fizo efectiva la extinción de l'antiga FEVE, a interpresa publica espanyola de ferrocarrils de vía estreita, que operaba principalment ixe tipo de linias en a Cordelera Cantabrica, y seguindo con o modelo de división que enantes se l'heba aplicau a la RENFE, Adif heredó a suya parte d'infraestructuras, mientres que la operación d'os trens quedó pa Renfe Operadora, naixendo asinas a división suya Renfe Feve.

División Adif y Adif AV

Detalle d'a estación de Zaragoza-Delicias, a principal intermodal de viachers en Aragón.

Dende l'1 de chinero de 2014 l'Adif ye segregau a la suya vegada en dos sociedaz de titularidat publica:[6]

  • Adif, que s'encarga de chestionar o rete convencional.
  • Adif AV, que s'encarga de construir y mantener as linias d'alta velocidat, y que heredó a mayoría d'a deuda que teneba Adif.

Ista división se fizo por o Reyal Decreto-lei 15/2013,[6] y d'acuerdo con bels medios[7] podeba obedeixer a la necesidat de tener as cuentas deseparadas, en seguimiento d'o Sistema Europeu de Cuentas de 2010, pa que os costes de construcción de nuevas linias d'alta velocidat y a firme deuda publica que se'n dimana, que no deixa de medrar,[8] no se veyesen refleixaus como déficit de l'Estau.[7]

Funcions

Adif tiene reconoixidas diferents funcions en a Lei d'o Sector Ferroviario y as sucesivas normativas que se i basan. As principals son:

  • L'administración d'as infraestructuras ferroviarias, como son as vías d'as diferents linias ferrias y as suyas estacions, as terminals de mercaderías, etc.
  • A chestión d'a circulación ferroviaria.
  • L'adchudicación d'a capacidat ferroviaria a os diferents operadors.
  • A percepción de cánons por l'uso d'as infraestructuras, estacions y terminals de mercaderías.
  • A elaboración d'a Declaración sobre o Rete.

Financiación y dispendio

A construcción de linias d'Alta Velocidat, ni mica proporcionada con as dimensions y demografía d'o país, ye a razón principal d'a deuda (17.600 millons d'Euros en 2018) que arrociega l'Adif.[9]

D'alcuerdo con as normativas europeas en vigor, en garra país miembro as interpresas publicas pueden financiar-se en mas d'o 50% directament por l'Estau, y se tienen que adubir por medio d'a suya actividat. Por ixa razón, l'Adif contempla como primer manera de cubrir os costes o cobro de taxas a os operadors ferroviarios a qui presta servicio, a os qui les ne carga con o concepto de cánons[10] y atros conceptos. A companyía tamién recibe financiación de l'Estau y de fondos d'a Unión Europea.[11]

Cánons

L'Adif repercute en os operadors ferroviarios diferents clases de cánons:[12]

Cánons por Utilización d'as Linias Ferroviarias RFICh

  • Canon d'Acceso (Modalidat A): Ye un d'os cánons por emplegar o RFICh. Deriva d'a concesión de capacidat pa os trens.
  • Canon por Reserva de Capacidat (Modalidat B): S'aplica a la reserva y disponibilidat d'o trachecto pa o tren.
  • Canon por Circulación (Modalidat C): Grava la utilización efectiva d'a Capacidat reservada.
  • Canon por Trafego (Modalidat D): S'aplica a o trafego que se faiga sobre a infraestructura ferroviaria.

Cánons por Utilización d'as Estacions u atras Instalacions

  • Canon por Utilización d'as Estacions (Modalidat A): S'aplica a os viachers de transporte ferroviario en función d'a distancia que recorren y a categoría d'as estacions aon comiencen u rematen o viache. L'operador ferroviario les ne repercute a traviés d'o preu de billet.
  • Canon por Estacionamiento y Utilización d'os Andens (Modalidat B): Se calcula en función d'o tiempo d'estacionamiento y as operacions de cambeo de vía que solicite l'operador y a categoría d'as estacions. No s'aplica en os primers 15 minutos d'estacionamiento, y a os servicios publicos d'obligau cumplimiento (Cercanías y Media Distancia) cuan empleguen andens d'uso reservau pa éls.

Desequilibrio presupuestario

Manimenos, o creiximiento intenso d'a deuda d'Adif debida a la construcción de grans infraestructuras especialment vinculadas con l'Alta Velocidat,[9][13] y a baixa ocupación d'os trens d'un solo operador que treballa en ixe segmento; Renfe Operadora, han feito platero que i hai un problema de financiación.

Os trens AVE de Renfe Operadora nomás transportón 20,4 millons de viachers en 2016,[14] contra os 417 millons de viachers que emplegoron os servicios de Cercanías y Meya Distancia en o país ixa anyada, xifra que puyó ta 490 millons en ixes dos servicios (os mas usaus) d'o rete convencional en 2017.[15] Si nos miramos as xifras d'inversión, dende 2014 dica 2019 o rete convencional d'Adif recibió 3.350 millons d'euros, muit por debaixo d'os 15.727 millons d'a infraestructura d'Alta Velocidat.[16]

A Comisión Europea estimó en 2018 un malafundiau de 26.240 millons d'euros en linias d'alta velocidat en Espanya entre 1995 y 2016.[17] D'os mas de 42.000 millons invertius en ixe periodo, 26.240 no se podrán recuperar pas,[17] o que significa bels 540€ perdius por habitant (y puyando) nomás que en iste quefer. Antimás, Espanya recibió o 47% d'os fondos europeus pa contrucción de ferrocarrils d'alta velocidat entre 2000 y 2017[18] y ye a primera en sobrecostes de construcción acumulaus entre as diferents linias,[18] razón por a cual fue sancionada.

Pa mirar-se de fer frent a tal desequilibrio presupuestario, en o verano de 2018 Adif fizo publico que puyaría un 92% os cánons a la operadora publica Renfe,[19] encara que sin fer variar os que cobraba a os operadors privaus.[19] Ixa decisión fue aturada por a Comisión Nacional d'os Mercaus y a Competencia (CNMC), luego, en septiembre d'ixe anyo.[20]

Referencias

  1. ↑ (es) Conocer Adif (en www.adif.es), consultada o 8 de marzo de 2019.
  2. ↑ (es) Ancho Métrico (en www.adif.es), consultada o 8 de marzo de 2019.
  3. ↑ (es) Declaración sobre la Red 2017; consultada o 8 de marzo de 2019.
  4. ↑ (es) El Gobierno determina las obligaciones de servicio público del transporte ferroviario de viajeros; 30 d'octubre de 2010; consultau o 8 de marzo de 2019.
  5. ↑ (es) Revisión de los servicios ferroviarios de viajeros declarados como obligación de servicio público; Noviembre de 2017, consultau o 8 de marzo de 2019.
  6. ↑ 6,0 6,1 (es) Disposición 13035 en o BOE de 14 d'aviento de 2013; consultau o 8 de marzo de 2019.
  7. ↑ 7,0 7,1 Noticia Adif se divide en dos empresas para que la deuda del AVE no vaya al déficit público, de 31 d'aviento de 2013, consultada o 8 de marzo de 2019.
  8. ↑ (es) Noticia Adif sube un 92% los cánones a Renfe para contener su insostenible deuda por el AVE, consultada o 8 de marzo de 2019.
  9. ↑ 9,0 9,1 (es) Noticia El impulso al nuevo AVE dispara la deuda de Adif hasta el récord histórico de 17.600 millones de euros, consultada o 8 de marzo de 2019.
  10. ↑ (es) Ley 39/2003, del Sector Ferroviario, consultada o 8 de marzo de 2019.
  11. ↑ (es) Financiación Europea en www.adif.es; consultada o 8 de marzo de 2019.
  12. ↑ (es) Cánones Ferroviarios (www.adif.es); consultada o 8 de marzo de 2019.
  13. ↑ (es) Noticia La gran deuda de Adif Alta Velocidad (17.600 millones de euros), consultada o 8 de marzo de 2019.
  14. ↑ (es) Noticia La deuda 'ahoga' a Adif Alta Velocidad: pierde 210 millones, un 25% más, consultada o 8 de marzo de 2019.
  15. ↑ (es) Un 90% de los viajeros de tren utilizaron servicios de cercanías y media distancia durante 2017, en a web d'a Comisión Nacional de los Mercados y la Competencia; consultada o 8 de marzo de 2019.
  16. ↑ (es) Noticia El AVE recibe cuatro veces más inversión que la red convencional de 7 de chinero de 2019, consultada o 8 de marzo de 2019.
  17. ↑ 17,0 17,1 (es) Noticia ¿Ha despilfarrado España en obras públicas? Según los geógrafos, 26.240 millones solo en el AVE de 19 de chunio den 2018, consultada o 8 de marzo de 2019.
  18. ↑ 18,0 18,1 (es) Noticia Los auditores europeos denuncian los sobrecostes y falta de pasajeros en la red de AVE, consultada o 8 de marzo de 2019.
  19. ↑ 19,0 19,1 (es) Noticia Adif sube un 92% los cánones a Renfe para contener su insostenible deuda por el AVE, de 20 d'agosto de 2018, consultada o 9 de marzo de 2019.
  20. ↑ (es) Noticia La CNMC congela los peajes que Renfe paga a Adif para 2018 de 26 de setiembre de 2018, consultada o 8 de marzo de 2019.

Se veiga tamién

Atros administradors ferroviarios europeus

Vinclos externos

Obteniu de "https://an.wikipedia.org/w/index.php?title=Administrador_d%27Infraestructuras_Ferroviarias&oldid=2062551"