Palazín
De Biquipedia
Un palazín ye uno de los 12 lechendarios guardians de Carlomaño (los 12 pars) en los cantars de chesta e istorias de romanze. Se basan en parte en los istoricos guardians francos de lo sieglo VIII e feitos como la batalla de Ronzesbals e la confrontazión de lo Imperio franco con Umayyad Al-Andalus en la "Marca Ispanica".
Los nombres de los 12 palazins son diferens de romanze á romanze, e á begatas se'n cuentan més de 12. Totas las istorias fablan de palazins con los nombres de Roldán e Oliber. Atros recurren á personaches como Arzebispe Turpín, Ogier de Dane, Huon de Burdeu, Fierrabrás, Renal de Montalbán e Guanalón. Las istorias de los palazins de Carlomaño bella begata ribalizoron en popularidat con lo rei Arturo e los caballers de la tabla redonda e forman un ziclo literario clamato Materia de Franzia u Ziclo carolinchio. En atro tiempo se leyeban los treballos de Ludovico Ariosto e Torquato Tasso tanto como los de Shakespeare, e contribuyoron muito á la literatura recordando istorias de los feitos epicos de los palazins.
Los 12 palazins de Carlomaño amanixen en lo Cantar de Roldán:
- Roldán — sobrín de Carlomaño e capeza de los palazins
- Oliber — amigo de Roldán e aliato més fuerte
- Gérin (Gelino en la Cronica de los Conquiridores)
- Gérier
- Bérengier (Berenguer en la Cronica de los Conquiridores)
- Otton
- Samson (Sanson en la Cronica de los Conquiridores)
- Engelier (Angelero en la Cronica de los Conquiridores)
- Ivon
- Ivoire
- Anséis
- Girard
Los italians Ludovico Ariosto e Torquato Tasso fablaban d'atros palazins:
- Orlando — Roldán, sobrín de Carlomaño e capeza de los palazins
- Oliber — ribal de Roldán.
- Ferumbras — Fierabrás, lo Sarrazén que se fazió Cristián (Ferragut en atras bersions).
- Astolpho — deszendién de Carlos Martel e primo de Orlando
- Ogier de Dane
- Guanalón lo traidor, qui amanix en lo Canto XXXII de lo Infierno de Dante Alighieri
- Rinaldo — Renal de Montalban
- Malagigi — Maugris, un fetizer
- Florismart — amigo de Orlando
- Guy de Borgoña
- Namo — Namus u Naimon
- Otuel — atro sarrazén combertito
[editar] Eboluzión linguistica
La parabra probién de lo latín palatinus ("ofizial de lo palazio"). Lo palazio en custión ye la cort carolinchia; compara los títols de "capitán de lo palazio" e "conte de lo palazio". La forma orichinal en franzés ye palaisin.
La eboluzión natural de lo latín PALATINUS ye Palacino en protoiberorromanze, e dimpués en aragonés Palazín; las dos esisten como toponimos u apellitos autuals (bi ha una Casa Palazín en Chistén). Relazionato talment con lo franzés u con l'oczitán, en Nabarra los reis de la dinastía de Campaña teneban entre lurs títols cuende Palazín (cuende ye en romanze nabarro conte).
Lo termin palazín autualment s'emplega pa referir-se (sobre tot en la fizión) á una presona que prene la misión de protecher bella cosa.
L'emplego més regular ye la espresión "Palazín de la chusticia", pa referir-se á belún que se dedica á conseguir que se cumplan las leis.
Muitos bideochuegos, como Diablo II, Lineage 2, Tibia, World of Warcraft, etz. han emplegato lo termin palazín pa clamar á un guerrer santo con facultaz de luita cuerpo á cuerpo e capazidaz curatibas, defensa e represión de sers demoniacos.
