Endospermo

De Biquipedia
Ir ta: navego, busca

O endospermo ya una part d'a simient que se fa servir como fuent de nutrients pa o desembolique d'o embrión y en bells casos tamién d'a plantula. L'albumen presenta haustorios capaces de prener materials nutritivos d'atras partz de l'ovulo.

L'albumen s'orichina en a doble fecundación d'as anchiospermas quan o nuclio d'una celula espermatica d'o polinico s'une a los nuclios polars d'o saco embrional orichinando una celula triploide. Dimpués d'esta fecundación se producen mitosis succesivas que no van acompanyatas d'a tabicación d'o citoplasma. O embrión ye empentato a lo centro d'o saco embrional por creixer o suspensor, devez que l'albumen queda en posicions cada vegata més perifericas. Una vegata que l'albumen embolica o embrión que ye en una posición interior y central se forman paretz que deseparan cadagún d'os nuclios que s'han formato enantes.

En as plantas que se cautivan destacan dos tipos d'albumen: l'albumen amilacio y l'albumen oliachinoso. L'albumen amilacio contién amelón y se troba en as simients d'as graminias y as leguminosas. L'albumen oliachinoso contién olios u aceites y se troba en as nueces, lino y o ricino. Bi ha atros tipos d'albumen como l'albumen cornio.

O destín de l'albumen en o desembolique d'a simient ye muito diferent segunt casos. En as simients d'as leguminosas se produce un transvase d'as reservas nutritivas de l'albumen a los cotiledons, y quasi desapareixe. En as simients d'as graminias quasi no ye consumito en a formación d'o embrión y os cotiledons tienen pocas reservas nutritivas. En as cruciferas queda redueito a una fina capa proteica que embolica o embrión.