Dreito Penal Internazional
De Biquipedia
O Dreito Penal Internazional ye a branca d'o Dreito Penal que estudeya y define os crimens internazionals y regula o funzionamiento d'os Trebunals Internazionals competents ta chuzgar á os indibiduos con responsabilidat churidica en ixos crimens, ta imponer as penas que corresponda. Ista branca ye una eboluzión d'o Dreito Internazional clasico, que nomás consideraba á os estatos como suchetos de Dreito Internazional.
Encara que bi ha atros prezedents d'emplego, como dimpués d'a Primera Guerra Mundial, ye en 1945, dimpués d'a Segunda Guerra Mundial, cuan s'alazetan os prenzipios churidicos d'o Dreito Penal Internazional, con os clamatos Chudizios de Nuremberg.
Dende 1998, en a ziudat neerlandesa de Den Haag tien a suya seu o Trebunal Penal Internazional (u Corte Penal Internazional), o primer trebunal de chustizia internazional permanent.
Contenius |
[editar] Istoria
[editar] Tratato de Versailles
Dimpués d'a Primera Guerra Mundial, o Tratato de Versailles teneba unas clausulas ta portar debant d'os trebunals de chustizia á os responsables de bels crimens comesos mientras a guerra. Sin d'embargo, o prenzipal responsable d'ixos actos, o kaiser Guillermo II, se refuchió en os Países Baxos, que li atorgoron asilo politico.
[editar] Chudizios de Nuremberg
Dimpués d'a Segunda Guerra Mundial, as potenzias aliatas acordoron a clamata Carta de Londres u Estatuto de Londres d'o Trebunal Melitar Internazional, ta chuzgar os crimens comesos mientras a guerra por o nazismo en os países ocupatos: o chenozidio, os crimens cuentra a umanidat, os crimens de guerra y os crimens cuentra a paz. Un trebunal similar se creyó ta os crimens chaponeses en Asia, o Trebunal Penal Melitar Internazional ta Estremo Orient.
Os Chudizios de Nuremberg zelebratos con ixas premisas estioron a base d'o desembolique d'o Dreito Penal Internazional. Asinas, a Resoluzión 95 de l'Asambleya Cheneral de l'Organizazión d'as Nazions Unitas, d'11 d'abiento de 1946, reconoxeba os prenzipios d'a Carta de Londres y tamién as sentenzias d'os Chudizios de Nuremberg; ta o suyo desarrollo pretendeba a codificazión d'un Codigo Penal Internazional y tamién d'establir un Trebunal permanent ta l'enchudiziamiento d'ixos crimens. Sin d'embargo, o trebunal permanent no fue establito.
[editar] Yugoslabia y Ruanda
Á finals d'o sieglo XX se fazió ebident a nezesidat d'un trebunal permanent, y se reautibó o intrés por o Dreito Penal Internazional, por a situazión en Yugoslabia mientras as Guerras yugoslabas en 1991-2001 y as suyas importants biolazions d'o Dreito Penal Internazional, pero tamién por o impacto sozial d'o chenozidio de Ruanda en 1994.
Como consecuenzia d'ixos feitos, en 1993 a Organizazión d'as Nazions Unitas establió un Trebunal Penal Internazional ta l'Antiga Yugoslabia, y en 1994 s'establió o Trebunal Penal Internacional ta Ruanda.
Antiparte, a Comisión de Dreito Internazional (u organo dependent d'a ONU) elaboró una normatiba churidica que sirbió ta la siñatura en 1998 d'o clamato Estatuto de Roma, por o cual s'establiba a Corte Penal Internazional.
[editar] Trebunals
Autualment, á más d'a Corte Penal Internazional, bi ha atros trebunals ta enchudiziar situazions concretas. Istos trebunals, creyatos ta casos ad hoc, son:
- Trebunal Penal Internazional ta l'Antiga Yugoslabia.
- Trebunal Penal Internacional ta Ruanda.
- Trebunal ta Cambocha, un organismo misto Cambocha-Nazions Unitas ta enchudiziar á os responsables d'o chenozidio cambochán.
- Trebunal Penal Espezial ta Sierra Leone, ta a Guerra Zebil en Sierra Leone.
- Trebunal Penal Espezial ta Libano.
[editar] Crimens internazionals
Os prenzipals crimens internazionals son:
- Chenozidio. Ye o esterminio u eliminazión sistematica por parte de funzionarios u representants d'un estato, miembros d'un grupo politico u particulars, de presonas que fan parte d'un grupo sozial carauterizato por a suya raza, luenga, relichión, ideyolochía u cualesquiera atra.
- Crimens cuentra a umanidat. Ye l'asesinato, esterminio, deportazión, desaparizión forzosa, tortura, biolazión, prostituzión forzata, esterilizazión forzata y engarcholamiento por motibos politicos, razials, relichiosos, etnicos u atros definitos en as normas penals internazionals.
- Crimens de guerra. Ye a biolazión d'o Dreito Internazional Umanitario, d'as Combenzions de Chinebra u atros combenios internazionals, u d'o Dreito consuetudinario internazional.
- Crimens cuentra a paz. No son definitos legalment, encara que os suyos alazets informoron l'autibidat chudizial en os Chudizios de Nuremberg
