Aeropuerto
De Biquipedia
Un aeropuerto ye un aria definita de tierra u augua destinata total u parzialment á la plegata, salita e mobimiento en superfizie d'aeronaus. Encara que os aeropuertos chicoz (comunment ditos aerodromos) tienen pistes curtas de grabilla u pasto, os grans aeropuertos disponibles ta buelos internazionals tienen pistas d'aterrizache pabimentatas d'un á bels quilometros de largaria.
En un aeropuerto, dende o punto de gollata d'as operazions aeroportuarias, se i pueden distingir dos partis: o "costato aire" e o "costato tierra". A diferenziazión entre as dos partis se deriba d'as diferents funzions que se i reyalizan.
En o "costato aire" as operazions s'aplican sobre as aeronaus e tot lo que se muebe arredol d'as suyas nezesidaz.
En o "costato tierra", os edifizios terminals tienen como funzión a coneusión entre os meyos de tresporte terrestre (beíclos, autobuses, tren, metro) e o meyo de tresporte aerio. O bolumen de pasachers e o tipo de trafico condizionan a confegurazión d'a terminal pero en cheneral totas as terminals tienen as siguients dependenzias: bestibulos de salita e plegata, control de pasaportes, salas d'embarque, zonas d'ozio, control de duanas.
O costato aire u tamién dito aria de mobimientos, ye formato por l'aria de maniobras (pistas e carrils de rodache) e a plataforma. A suya funzión ye o rodache d'as aeronaus dica/dende as pistas e o despegue e aterrizache d'as aeronaus.
Un aria important en tot aeropuerto ye o dito zentro de control aerio, á on que se troban os ditos controladors de transito aerio u ATC (por as suyas inizials en anglés), encargatos de dirichir e controlar tot o mobimiento d'aeronaus en l'aeropuerto e en a zona baxo a suya churisdizión.
A plataforma ye l'aria destinata á dar espazio á las aeronaus mientres se reyalizan as operazions d'embarque e desembarque de pasachers u mercanzías asinas como atras operazions d'atenzión á l'aeronau (repostache de combustible, chicot mantenimiento, limpieza).
Contenius |
[editar] Aeropuertos con más transito
Os zinco aeropuertos con más transito d'o mundo en l'año 2006 estioron Atlanta (84.8 millons de pasachers), Chicago (67.5), Londres Heathrow (67.5), Tokio (Haneda) (65.2) e Los Angeles (61.0).
Istos grans aeropuertos d'on salen e plegan buelos de luenga distanzia que se reyalizan por meyo d'abions de gran capazidat, reziben o nombre de hubs. Istos aeropuertos grans tienen tamién enlazes con ziudaz más chicotas, que son serbitas con abions de grandaria menor. Por meyo d'iste sistema, as compañías aerias pueden emplir os suyos abions grans en os trayeutos de luengo recorrito. Á sobent, os orarios d'os buelos curtos son cordinatos con os buelos de gran recorrito de tal manera que os pasachers han d'asperar unicament o tiempo preziso ta prener o siguient buelo.
[editar] Aeropuertos en Aragón
En Aragón autualment bi ha dos aeropuertos, l'aeropuerto de Zaragoza e l'aeropuerto de Uesca-Perineus. Seguntes datos d'AENA de l'año 2008[1] l'aeropuerto de Zaragoza ye o 28eno d'o Estato Español por numero de pasachers con 594.952 pasachers añals, pero abendo crexito un 16,2% dende l'año anterior, e o 5eno aeropuerto por numero de mercanzías con 21.438.894 Tm e un creximiento d'o 6,4% respeutibe á l'año 2007. L'aeropuerto de Uesca ocupa la posizión 45 por numero de pasachers 3.982, pero con un creximiento d'o 187,3%, o mayor de tot o Estato.
[editar] Se beiga tamién
[editar] Referenzias
[editar] Enrastres esternos
