Tipo nomenclatural

Iste articlo tracta sobre os tipos nomenclaturals en Biolochía. Pa atros significaus d'a parola tipo, se veiga Tipo (desambigación).

Tipo nomenclatural de Cimbrophlebia brooksi, una especie fósil d'insecto. A etiqueta roya indica por convención que se tracta d'un tipo.

Un tipo nomenclatural, tipo porta-nombre u, las más vegadas, simplament tipo u especimen tipo ye un eixemplar u conchunto d'eixemplars d'un organismo, de a suya actividat u as suyas restas fósils, con o qual s'ha feito una descripción scientifica formal de l'organismo y que chustifica o nombre scientifico d'a especie.

O tipo nomenclatural d'una especie ye, de regular, o especimen a partir d'o qual s'ha feito la descripción que chustifica o nombre scientifico, y se conserva de perén en una institución (museu, herbario, centro d'investigación, etc.) perfectament siglau y localizable.

Os taxons por alto d'o ran d'especie no tienen eixemplars u especimens como tipo, sino nombres de a categoría taxonomica inmediatament por debaixo. Asinas, o tipo nomenclatural d'un chenero será a especie sobre a qual se fizo a descripción que validaba orichinalment o nombre, y se conoix como especie tipo. O tipo d'una familia ye o chenero (chenero tipo) sobre o qual se basaba a descripción orichinal de a familia, etc. En os libels taxonomicos por alto de a familia, o principio de tipificación nomenclatural no s'aplica necesariament.

Clases de tipos

• Holotipo: ye o especimen u bell atro elemento emplegau por l'autor d'a descripción ("autoridat") u designau por ell como tipo.
• Isotipo: ye un duplicau de l'holotipo que se conserva en a colección orichinal.
• Sintipo: ye un d'os especimens nombraus por l'autoridat quan no esleyó un holotipo concreto, u quan enumeró diferents especimens como tipos sin especificar-ne uno como principal.
• Lectotipo: especimen u elemento seleccionau, a partir de o material orichinal, pa servir como tipo nomenclatural quan no se'n asignó un holotipo en a primer publicación u l'holotipo asignau orichinalment se perdió dimpuesas. O lectotipo s'ha d'esleir entre os isotipos u, si no n'i ha, s'ha d'esleir entre os sintipos. Solament en caso de que no i haiga tampoco sintipos s'esleirá un neotipo.
  • Paralectotipo: especimen que s'adhibe a una colla de sintipos dimpués que d'ella se'n haiga sacau un lectotipo.
• Neotipo: Ye un eixemplar u especimen que se selecciona pa servir de tipo nomenclatural quan manca u no se tiene tot lo material que sirvió orichinalment pa fer a descripción d'o taxón.
• Icnotipo: ye o tipo nomenclatural d'os icnotaxons, taxons descritos a partir de trazas fósils indirectas de l'actividat de l'organismo, como niedos, pisadas, matriqueras, coprolitos, bayos deixaus por a coda u excavacions diversas en o sustrato.

Se veiga tamién

• Nombre scientifico.
• Nomenclatura binominal.
• Taxonomía.

Vinclos externos

• Se veigan as imachens de Commons sobre tipos nomenclaturals.