Pistilo

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Flor de Malva neglecta a la qual se l'ha sacau os petalos. En o centro y de color verde y morada, o pistilo.

O pistilo (d'o latín <PISTILUM, «mallo de mortero») ye l'organo reproductivo femenino d'as plantas anchiospermas, que de regular se troba en o centro d'a flor y ye formau por un carpelo (pistilo unicarpelar) u más d'un carpelo (multicarpelar). Os carpelos que forman o pistilo son en realidat un verticilo de follas modificadas.

O conchunto de pistilos que i haiga en a flor constituyen o chineceu. Os chineceus pueden constar d'un pistilo u más d'uno que, a la suya vegada, pueden estar chunius por paretz soldadas (chineceu gamocarpelar u sincarpico) u libres entre ells (chineceu dialicarpelar u apocarpico).

Partes d'o pistilo

En o pistilo se fa distinción de tres partes claras:

• L'ovario: A cavidat a on que i son zarraus os ovulos. Sole estar a parte más baixa, en contacto con o pedunclo u a base d'a flor y tener una forma más engruixida y arronchada, como una pancha. Se troba arrodeyau de a resta de verticilos florals y en función de a posición que ocupa en relación con ixes, se charra d'ovarios superos u inferos.
• O estilo: Ye una parte estéril y forma un cuello u conducto por a on que pasará o conteniu chenetico d'o polen mientres os ovulos se fecundan. Puede no existir en determinadas especies, y o estigma trobar-se alavetz chusto en alto de l'ovario (estigma sésil).
• O estigma: Cavidat u receptaclo superior de totz, que se troba en o extremo d'o estilo. Produce o liquido estigmatico, que fa que o grano de polen s'apegue y facilita la fecundación. Existen os estigmas sésils, en flors que no tienen estilo.

Se veiga tamién

• Chineceu.
• Androceu.
  • Estambre.
    • Filamento.
    • Antera.

Vinclos externos

• Se veigan as imachens de Commons sobre pistilos.