Muyenco
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Un muyenco, u muyén[1] en as vals de Chistau y Bielsa, ye un monyaco de forma humana feto de trapo u palla y vestiu con ropa de persona que ye tipico de bellas fiestas populars de l'Alto Aragón, como os Carnavals y as Mohigangas. O muyenco representa un personache, de regular forano, que viene ta la villa y encarna la borina y a diversión entre que dura ixa festividat, pa plegar estando trobau culpable d'os excesos de toz y aplicando-se-le bel tipo de chusticia publica en rematar a fiesta.
De regular, o muyenco tiene un papel principal en a fiesta y marcha de puntero con o seguicio si se fa ronda de Carnaval, por eixemplo (caso de Chistau, a Fueva u Nerín). Pa fer-lo, va ligau contra un palo y s'amonta en un somero (en Sant Chuan de Plan o burro que s'emplega se diz «el Burricau»[2]). En o carnaval d'a Fueva, que ye intinerant y se fa con os autos, o muyenco va ligau contra un vehiclo (en a parte de dezaga u en o techo), y circula ubrindo o seguicio cuan a ronda se treslada d'un lugar ta l'atro.
No en toz os casos ixe papel o fa un monyaco. Por eixemplo, en o Carnaval de Torla, o «Carnaval» ye interpretau por un mozo d'a villa de principio ta la fin d'a fiesta. En a Mohiganga de Graus, «el Furtaperas» l'interpreta tamién un mozo mientres ye la ronda, pero cuan ye pinchau en a frontera d'a Casa la Villa ye un muyenco.
Chudicio y muerte
[editar | modificar o codigo]A muerte d'un muyenco ye la zaguer fase d'a fiesta. En bels casos i hai bella respresentación de chudicio publico u a lectura d'un veredicto y alavez se pasa a la execución. En uns puestos se lo crema u se l'afusila,[1] en atros se pende d'un puesto publico, como ye a frontera d'a Casa d'a Villa en Bielsa. Tot esto simboliza la redención colectiva y a tornada de l'orden social: o Carnaval ye muerto.
Eixemplos
[editar | modificar o codigo]- O «Carnuz» en o Carnaval de Nerín.[3]
- «Cornelio Zorrilla» en o Carnaval de Bielsa.[4]
- «El Peirot» en o carnaval de Sant Chuan de Plan.[2]
- «El Carnal» en Chistén.
- «El Furtaperas» en a fiesta de la Mohiganga de Graus.
- «O Carnaval» en o Carnaval de Torla y o de Broto, aon que los interpreta una persona.
Referencias
[editar | modificar o codigo]- ↑ 1,0 1,1 (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Institución «Fernando el Católico» + Gara d'Edizions. Zaragoza, 2008. ISBN 978-84-8094-061-0
- ↑ 2,0 2,1 (es) Carnavales del Valle de Chistau, consultada o 27 de marzo de 2019.
- ↑ (es) Carnaval de Nerín, consultau o 27 de marzo de 2019.
- ↑ (es) Carnaval de Bielsa, consultada o 27 de marzo de 2019.