Muyenco

De Biquipedia
Ir a la navegación Ir a la búsqueda

Un muyenco, u muyén[1] en as vals de Chistau y Bielsa, ye un monyaco de forma humana feto de trapo u palla y vestiu con ropa de persona que ye tipico de bellas fiestas populars de l'Alto Aragón, como os Carnavals y as Mohigangas. O muyenco representa un personache, de regular forano, que viene ta la villa y encarna la borina y a diversión entre que dura ixa festividat, pa plegar estando trobau culpable d'os excesos de totz y aplicando-se-le bell tipo de chusticia publica en rematar a fiesta.

De regular, o muyenco tiene un papel principal en a fiesta y marcha de puntero con o seguicio si se fa ronda de Carnaval, por eixemplo (caso de Chistau, a Fueva u Nerín). Pa fer-lo, va ligau contra un palo y s'amonta en un somero (en Sant Chuan de Plan o burro que s'emplega se diz «el Burricau»[2]). En o carnaval d'a Fueva, que ye intinerant y se fa con os autos, o muyenco va ligau contra un vehiclo (en a parte de dezaga u en o techo), y circula ubrindo o seguicio quan a ronda se treslada d'un lugar ta l'atro.

No en totz os casos ixe papel o fa un monyaco. Por eixemplo, en o Carnaval de Torla, o «Carnaval» ye interpretau por un mozo d'a villa de principio ta la fin d'a fiesta. En a Mohiganga de Graus, «el Furtaperas» l'interpreta tamién un mozo mientres ye la ronda, pero quan ye pinchau en a frontera d'a Casa la Villa ye un muyenco.

Chudicio y muerte[editar | editar código]

A muerte d'un muyenco ye la zaguer fase d'a fiesta. En bells casos i hai bella respresentación de chudicio publico u a lectura d'un veredicto y alavetz se pasa a la execución. En uns puestos se lo crema u se l'afusila,[1] en atros se pende d'un puesto publico, como ye a frontera d'a Casa d'a Villa en Bielsa. Tot esto simboliza la redención colectiva y a tornada de l'orden social: o Carnaval ye muerto.

Eixemplos[editar | editar código]

Referencias[editar | editar código]

  1. 1,0 1,1 (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Institución «Fernando el Católico» + Gara d'Edizions. Zaragoza, 2008. ISBN 978-84-8094-061-0
  2. 2,0 2,1 (es) Carnavales del Valle de Chistau, consultada o 27 de marzo de 2019.
  3. (es) Carnaval de Nerín, consultau o 27 de marzo de 2019.
  4. (es) Carnaval de Bielsa, consultada o 27 de marzo de 2019.

Se veiga tamién[editar | editar código]