Melitar

De Biquipedia
Ir a la navegación Ir a la búsqueda
Articlo d'os 1000
Recreación historica d'una unidat d'Artillería d'o Exercito francés en 1805, mientres as Guerras napolionicas.
Soldato d'o Imperio inca, en una choya de l'arte incaico.
Soldatos d'o Exercito chinés.
Soldatos d'o Exercito ruso.
Soldatos d'o Exercito tailandés.
Soldatos de Caballería polacos a o servicio de Napolión Bonaparte en misión de reconoixencia mientres a Guerra d'o Francés, en un quadro de Juliusz Kossak.
Carga d'a Caballería d'o Exercito francés mientres a batalla de Friedland, en un quadro d'Édouard Detaille.
Caballería cosaca, en un quadro de Józef Brandt.
Tropas d'o Exercito ruso en una trinchera mientres a Primera Guerra Mundial.
Emplego de bombas de napalm por o Exercito estatounitense mientres a Guerra de Vietnam.

Un melitar ye una presona que fa d'o servicio en as Fuerzas Armatas regulars d'un país o suyo medio de vida. Enquadrato asinas en as Fuerzas Armatas, i ocupa un puesto hierarquico, conoixito como rango u grau. Ista caracteristica esferencia a lo melitar, perteneixient a una organización controlata directament por o estato, d'as fuerzas paramelitars que no se troban baixo o suyo control; o melitar ye asinas identificato por bells signos distintivos externos, como o suyo uniforme y por a suya pertenencia a una unidat melitar hierarquicament organizata. Cal parar cuenta que a composición d'as Fuerzas Armatas puet estar voluntaria u tamién por o sistema de leva d'entre os civils ta encorporar-los-ie temporalment.

Tamién cal esferenciar-lo d'o mercenario, qui tamién fa parte d'as Fuerzas Armatas encara que dentro d'una unidat melitar privata, encara que baixo o control teorico d'o estato que la contrata, estando amás asobén nacional d'un estato diferent a l'estato que lo contrata.

Antiparte, cal esferenciar-lo tamién d'o terrorista, un termin que fa referencia a las presonas que emplegan a violencia contra as institucions estatals ta conseguir as suyas finalidatz politicas, y d'o resistent, que ye una presona que no fa parte d'una unidat melitar organizata ni ye baixo o control estatal, emplegando tamién a violencia, pero que asobén se considera que actúa ta lograr o restablimiento d'a independencia d'o suyo país, que ye ocupato melitarment en forma total u parcial por una potencia forana.

Ta rematar, s'esferencia d'atras unidatz armatas, como a Policía, en que a suya misión prencipal no ye de mantener l'orden interno d'o país, sino a protección d'as suyas mugas contra un enemigo forano.

Historicament, mientres a Prehistoria y a Edat Antiga, no existiba a fegura d'o melitar en sentito estricto, estando qualsiquier miembro d'a sociedat apto ta la luita en prencipiar una guerra. Sindembargo, quan apareixioron os grans imperios de l'Antigüidat, como l'Imperio echipcián u l'Imperio román, naixió a fegura d'o melitar profesional, que feba d'ista actividat o suyo medio prencipal de vida y que recibib un entrenamiento melitar que li permeteba d'estar un ran dencima d'o nivel en que podía plegar un ciudadán que no hese recibito dito entrenamiento. Mientres a Edat Meya, a diferencia prencipal yera entre a Caballería, formata por miembros d'a nobleza que yeran quasi melitars, y a Infantería, formata por labradors sin muita formación melitar alistatos nomás que ta una campanya melitar concreta. As primeras unidatz profesionals que se formoron estioron bellas unidatz d'arquers, que emplegaban un arma (l'arco) que en ixe inte yera un arma especializata. En os sieglos XVI-XVIII, se formoron ta la guerra unidatz de mercenarios, que constituiban a parte prencipal en os grans exercitos. Ista situación cambeó con a Revolución francesa, quen s'estendilló a ideya de que una d'as obligacions d'o ciudadán yera la de prestar por un tiempo o suyo servicio melitar, ta fer que en caso de guerra estase a punto ta fer parte d'o Exercito: apareixioron asinas as grans campanyas melitars que movilizaban millons de soldatos, mandatos por grans estrategas como Napolión Bonaparte. Mientres a Primera Guerra Mundial, y encara mas mientres a Segunda Guerra Mundial, l'aplicación d'os abances tecnicos de l'industrialización a la guerra fació necesario l'adiestramiento d'os melitars por una luega durada, tonando a apareixer o melitar profesional, situación que actualment ye vichent en quantos países, incluyindo-ie Espanya.

Etimolochía[editar | editar código]

A parola melitar provién d'o latín militarius, derivato de miles (ye decir, soldato).

Tipos de melitars[editar | editar código]

En resumen, un melitar puet estar:

  • Presonal contractato por un tiempo ta fer as funcions melitars, con caracter voluntario.
  • Presonal de carrera, ye deir, que ha feito os estudeyos d'a carrera melitar en una Academia melitar y sirve a sobén como oficial u suboficial.
  • Presonal enrolato por o estato de forma obligatoria como un deber civico, en as ditas levas, como en o sistema que existeba en Espanya dica os anyos 1990, en que totz os ciudadans de chenero masculín pasaban una anyada (u dica dos anyadas, d'antis más) en o Exercito.
  • Presonal civil enrolato forzosament en caso de guerra.

Funcions d'o melitar[editar | editar código]

Un melitar puet tener una actividat operacional en o campo de batalla, d'adiestramiento d'atros melitars, de mando superior u d'oficina. A organización d'un exercito fa necesarios un mando (t'a coordinación d'as tropas) y una lochistica, components de muita importancia en as mudernas Fuerzas Armatas. Asobén se charra d'«escalerón»: escalerón de mando, escalerón lochistico y escalerón operacional.

Ta os emplegos operacionals, se puet destinguir:

Cal parar cuenta tamién d'atras actividaz melitars, como a Intelichencia melitar, adedicata a o espionache y contraespionache, ya siga en l'interior d'o propio país u en l'exterior, ta reunir informacions sobre as actividaz, tecnicas, disposición y capacidatz d'atros exercitos foranos.

A sciencia tien tamién muita importancia por o suyo uso melitar, y tamién se charra asinas d'a sciencia melitar, a ormino t'o desembolique d'a tecnolochía melitar.

O melitar en a Historia[editar | editar código]

Prehistoria[editar | editar código]

En a Prehistoria, no existiba o melitar como una profesión, en estar tot miembro d'una sociedat un melitar en caso de conflicto, situación que continó en quantos estatos de l'Antigüidat. Sindembargo, en os grans imperios de l'Antiguidat, en l'Antigo Echipto y en l'Imperio román, os melitars esdevenioron uns profesionals, a lo menos en quantas unidatz selectas.

Imperio román[editar | editar código]

Mientres l'Imperio román, s'alistoron en a Lechión romana os soldatos por primera vegata como soldatos profesionals, prestando-ie os suyos servicios por una luenga durada, y recibindo formación melitar ta cumplir millor con a suya misión. A prestación de servicio por os ciudadans romans se completaba con l'alistamiento de presonas que, encara que naixitas dentro d'as mugas de l'Imperio, no teneban a ciudadanía romana, que nomás adquiriban que en estar licenciatos, dimpués de 25 anyadas de servicio, esdevenindo os soldatos dimpués d'estar licenciatos un instrumento prencipal en a politica de latinización d'as poblacions conquiestas. Sindembargo, nomás qui teneba ciudadanía romana (u latina) prestaba o suyos servicios en a Lechión, prestando servicios a resta en unidatz especials ditas auxiliars, a ormino de Caballería en as ditas Alae.

Edat Meya[editar | editar código]

Mientres a Edat Meya no existiba a fegura d'o melitar profesional, y en ixas envueltas lo mas amanato a un melitar yeran os nobles que feban parte d'a Caballería, y que yeran decisivos en a mayor parte d'as batallas. A infantería en ixe inte yera formata nomás que por por labradors que no teneban formación melitar y que s'alistaban nomás que ta una campanya melitar concreta.

Sindembargo, tamién apareixioron en ixe inte dos tipos de soldatos que sí se puet considerar que yeran profesionals, totz dos mercenarios que luitaban a cambeo d'una paga u soldata. D'una man, bi heba os grupos de caballers mercenarios, segundons d'a nobleza u miembros d'a chicota nobleza que buscaban por medio d'a suya participación en as guerras un botín ta incrementar os suyos recursos economicos y a suya posición social. D'atra man, os soldatos que manipulaban bellas armas especializats, como l'arco u a dita artillería en ixas envueltas (ye decir, catapultas, onagres y atras armas de setio). Ixos especialistas se contrataban en o caso d'os arquers siempre con as suyas armas, y tamién se faba asinas asobén con os especialistas en artillería, situación que se reprodució en apareixer a primera artillería tal como hue se conoix, con emplego d'a polvora.

Renaiximiento[editar | editar código]

Mientres o Renaiximiento, no nomás fació a suya aparición a moderna artillería, sino que amás prencipió a existir un Exercito permanent a lo servicio d'as prencipals monarquías u reinos, que yeran os países que teneban suficients recursos economicos ta fer frent a lo suyo coste. Tamién aparicioron os ditos condottieri en a peninsula italica, formando dende o sieglo XIV unidatz melitars completas que contrataban os chicotz estatos d'a peninsula ta las suyas guerras, en un sistema quasi codificato a on no yeran freqüents as mortaleras de presoners.

Sindembargo, tamién apareixioron en Europa as guerras por de motivos relichiosos, con as mortaleras de presoners en rematar a batalla, feito que dica ixe int nomás se feba en as luitas contra os musulmans. A confrontación ideolochica, amás d'a creixencia d'o poder estatal, fació que amanixiesen en o continent os grans exercitos en campanyas quasi permanents, fendo nomás una parada en hibierno, quan as condicions climatolochicas feban difícil a continación d'as operacions melitars. En ixas envueltas destacoron os ditos tercios de l'Exercito espanyol que luitoron en os Países Baixos espanyols contra os sublevatos protestants d'as Provincias Unitas y contra os suyos aliatos, os angleses y os franceses, amás de contra os exercitos protestants de suecos y alemans.

Sieglos XVIII y XIX[editar | editar código]

A Revolución francesa estió un momento clau en a evolución d'a fegura d'o melitar. Seguntes as ideyas liberals d'os revolucionarios franceses, desapareixiba a condición de subchecto d'una monarquía ta amanixer a condición de ciudadán d'una democracia. Asinas, mesmo que o ciudadán pagaba uns impuestos ta fer que l'estato podese fer frent a las suyas necesidatz, tamién pagaba en forma de prestación d'un servicio melitar obligatorio, formando asinas exercitos de ciudadans armatos. Ta mandar y enquadrar a ixos soldatos, apareixioron os oficials de carrera, formatos en Academias melitars y con conoixencias especializatas en o mando y planificación d'as operacions melitars, que teneban ta las suyas maniobras a la suya disposición una gran masa de soldatos. Tamién s'emplegaba una abundant artillería y atras armas mudernas en o frent de batalla.

O melitar más caracterizato d'ixe periodo ye Napolión Bonaparte, qui con os suyos mariscals y chenerals luitó por primera vez en batallas por toda Europa, dende Rusia dica Portugal, u mesmo fuera d'Europa, como en Echipto.

Sindembargo, en os anyos 1870, con a Guerra Franco-prusiana, a tecnica aplicata a las armas fació que s'inventase a metralladora, con una potencia de fuego tan important que feba imposible as batallas como dica ixe inte s'heban conoixito, encara que ista lección no s'aplicó encara por os Estatos Mayors.

Sieglos XX y XXI[editar | editar código]

Primera Guerra Mundial[editar | editar código]

En a Primera Guerra Mundial o sistema d'exercitos masivos formatos por millons de soldatos ya yera o sistema habitual, estando enquadrato por un chicot exercito formato por profesionals y por oficials que tamién yeran profesionals. Sindembargo, en ista guerra uno d'os elementos más destacatos estió l'aplicación a las tecnicas y a l'armamento melitar d'as zagueras innovacions tecnicas y d'os descubrimientos scientificos.

A mesma potencia de fuego a que heba plegato en ixas evueltas l'artillería y l'emplego masivo d'a metralladora facioron que os ataques contra posicions fortificatas esdeveniesen un autentico suicidio. Se creyoron trincheras como sistemas de fortificación ta la protección d'o frent de batalla d'os ataques de l'enemigo, contando-se asinas os abances territorials en metros de territorio, que amás restaba arrasato de raso.

Tamién apareixioron atras innovacions, como l'emplego masivo d'os automóvils u d'o ferrocarril ta o transporte de tropas, u l'emplego de nuevas armas como o tanque u l'avión melitar, anque que en ista guerra no s'emplegoron encara a plena capacidat.

Segunda Guerra Mundial[editar | editar código]

Ista situación s'intensificó mientres a Segunda Guerra Mundial.

D'una man, a Wehrmacht con l'emplego d'a blitzkrieg (emplego masivo de tanques y aviación, fació un uso intensivo (encara que nomás que en puestos concretos) d'a sciencia aplicata a la guerra, situación encara mas desembolicata por o Exercito estatounitense, que plegó a l'emplego d'a bomba atomica contra o Chapón.

D'atra man, con ixo calía una mayor tecnificación d'os melitars, que luitaban en vehiclos especializatos con armamento sofisticado, armamento que requería d'una important formación tecnica d'os melitars (y tamién d'os oficials ta l'emplego correcto d'os nuevo medios de luita).

Posguerra y actualidat[editar | editar código]

Con istos antecedents, se plega curiosament a una situación pareixita a la situación anterior a la Revolución francesa: un chicot grupo de melitars, altament tecnificato y profesional, forma os exercitos actuals, rematando con o servicio melitar obligatorio y creyando un exercito profesional a on asobén en fan parte soldatos d'atros países. Continan existindo as Academias melitars ta formar a los futuros oficials, encara que os soldatos ya tienen a vegatas una relación quasi laboral con as suyas Fuerzas Armatas.

Melitarismo y antimelitarismo[editar | editar código]

A posición d'a sociedat dabant d'os melitars fa que se pueda charrar de melitarismo y d'antimelitarismo, en un debat que ha dividito modernament as sociedatz civils.

Un eixemplo d'istos debats podemos trobar-lo en a Francia d'a Tercera Republica en relación con o dito caso Dreyfuss.

Se veiga tamién[editar | editar código]