Kristallnacht

De Biquipedia
Ir ta: navego, busca
Os chodigos son obligatos a marchar por as carreras alemanas con a estrela de David o día siguient a la Kristallnacht.
Una botiga de propiedat chodiga en Magdeburgo o día siguient a la Kristallnacht.

Se conoix con o nombre de Kristallnacht (en alemán "nueit de vidre(s) (crebatos)") a un autentico pogrom organizato por as autoridatz nazis d'o Tercer Reich en a nueit d'o 9 a o 10 de noviembre de 1938 contra a población chodiga que i viviba, que se considera como uno d'os trangos que conducioron dreitament enta l'Holocausto.

Mientres a nueit, miembros d'as Sturmabteilung y d'as Schutzstaffel d'o Nationalsozialistische Deutsche Arbeiterpartei d'Adolf Hitler, con aduya d'atras organizacions nazis, como a Chovenalla Hitleriana, a Sicherheitsdienst u a Gestapo, y tamién d'as propias fuerzas regulars d'a Policía, engarcholoron a milers de chodigos por toda Alemanya, destruyindo a mas as suyas propiedatz presonals u colectivas: botigas, sinogas, centros de reunión... Tamién facioron una mortalera de quasi 100 presonas, en o que estió una prebatina ta comprobar a capacidat d'a población alemana t'asimilar un posterior ataque mes gran contra os chodigos. Alto u baixo 30.000 chodigos fuoron engarcholatos en os campos de concentración.

A excusa ta istos feitos estioron os disparos que Herschel Grynszpan, un chodigo aleman refuchiato en Francia, fació en París contra Ernst vom Rath, un diplomatico de l'embaixata alemana, qui morió o 9 de noviembre de resultas d'as suyas feritas. As primeras afirmacions d'os dirichents nazis yeran que os ataques yeran una "reacción espontania d'o pueblo alemán dimpués de l'atentato chodigo".

Antiparte, os chodigos fuoron condenatos a pagar una multa colectiva de 3.000 millons de marcos, ta indemnizar a l'estato alemán por os danyos que heba padeixito. Garra chodigo fue indemnizato por os danyos en as suyas propiedatz u en as suyas presonas. Internacionalment, a mayor parte d'os países facioron condenas (a Espanya de Francisco Franco, encara en guerra con a Segunda Republica Espanyola, aplaudió istos feitos; a Republica los condenó).[1]

Vinclos externos[editar | editar código]

Referencias[editar | editar código]