Habito cristalín

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

L'habito cristalín describe l'aspecto macroscopico que presentan los minerals. L'habito ye condicionau por factors externos a lo mineral, como por eixemplo, las condicions ambientals que bi heba mientres se formaba.

La estructura cristalina tamién influye en l'habito, encara que muitas vegadas l'aspecto d'un mineral puet despistar sobre la suya estructura cristalina, (como esdevién con l'aragonita). Minerals con la mesma estructura cristalina no tienen por qué presentar lo mesmo habito, y dica un mesmo mineral puet desembolicar-se de diferents trazas. cualques habitos son especificos d'una localidat.

En una primera clasificación, l'aspecto de los minerals se puet dividir en cristalins aislaus, asociacions u agregaus de cristals, y masas. Adintro d'estos grupos, se fan servir diferents termins que describen la forma de lo mineral. Como los minerals pueden prener cualsiquier forma imachinable, no bi ha listas sistematicas ni definicions estrictas pa os diferents habitos. Los mes habituals se describen a continación.

Cristals aislaus

• 
  Acicular: cristals lambrenyos en forma d'agullas, como en lo cheso
• 
  Filiforme: fins brins, similars a cabellos, como en las zeolitas.
• 
  Prismatico y columnar: en forma de prisma, como en la turmalina
• 
  Piramidal, Bipiramidal: prisma acabau en piramide en un u en los dos cabos, como en lo chacinto de Compostela (variant de lo cuarz)
• 
  Coraloide: en forma de coral, como en l'aragonita

Pirita en forma de dodecaedro

Pa describir l'habito de los cristals tamién se fa servir termins que fan referencia a la suya forma cheometrica: cubo, octaedro, dodecaedro...

Agregaus de cristals

• 
  Arborescent: similar a un árbol, como l'archent nativo
• 
  Dendritico: con forma de fuellas de plantas, como en la pirolusita
• 
  Reticulau: cristals fins formando un ret, como en la cerusita
• 
  Fibroso: muestra fibras chicotas paralelas que se pueden deseparar, como en lo cheso
• 
  Foliau: formau por lamas chicotas que se pueden deseparar, como la mica
• 
  Cheoda: cristals recobrindo l'interior d'una piedra, como en l'agata
• 
  Drusa: cristals recobrindo la superficie d'una piedra, como en l'ametista
• 
  Radial: cristals disposaus en cerclo dend'un mesmo punto central, como en la pirolusita

Masas

• 
  Masivo o compacto: sin de forma determinada, como la serpentina
• 
  Granular: chicoz grans de mineral, como en la bornita.
• 
  Globular: individuos esfericos, como la calcita
• 
  Oolitico u pisolitico: esferas disposadas como las frezas de los peixes, como la calcita en la calsinera oolitica
• 
  Botroidal: formas esfericas agrupadas formando carrazos, como en l'apatita
• 
  Reniforme: formas pareixidas a rinyons, mes alargadas que en l'habito botroidal, como en lo hematites
• 
  Mamilar: formas esfericas amplas y planas pareixidas a tetas, como en la smithsonita
• 
  Bandiau: bandas de diferent textura y color, como en l'agata
• 
  Amigdaloide: nodulos de mineral en forma d'almendra
• 
  Concreccionau o nodular: masas esfericas irregulars, como en la calcedonia
• 
  Estalactitico: en forma de cilindros u conos, recordando a las estalactitas

• Datos: Q505892
• Multimedia: Minerals by habit / Q505892