Guerra de Bosnia-Herzegovina
| Guerra de Bosnia-Herzegovina | ||
|---|---|---|
| Guerras yugoslavas | ||
 Imáchens d'a Guerra d'independencia de Bosnia-Herzegovina. | ||
| Información cheneral | ||
| Calendata: 1 de marzo 1992-14 d'aviento 1995 | ||
| Puesto: Bosnia-Herzegovina, Croacia, Serbia | ||
| Resultau: Paz forzada con partición de Bosnia-Herzegovina en cantons etnicos, os serbos con a millor part, consumación d'a limpieza etnica. | ||
| En conflicto | ||
 Fuerzas armadas crovatas
|
.svg){kind=small} Yugoslavia
|
 Bosnia-Herzegovina
|
| Comandants | ||
| Franjo Tuđman Mate Boban Milivoj Petković Dario Kordić |
Slobodan Milošević Radovan Karadžić Ratko Mladić |
Alija Izetbegović Sefer Halilović Rasim Delić |
| Soldaus | ||
| ~70.000 | ~120.000 | ? |
A guerra d'independencia de Bosnia-Herzegovina estió una guerra escaicida en 1992-1995 en a Republica de Bosnia y Herzegovina que siguió a la declación d'independencia d'esta antiga republica yugoslava dimpués d'un referendum y esdevinió una guerra complexa que enfrentó a nacionalistas serbos y crovates contra o Gobierno legal de Bosnia y Herzegovina, refirmau por os nacionalistas bosniacos musulmans y bell serbo y crovates no secesionistas. Encara que teneba o mesmo caracter de guerra d'invasión con aduya de disidents en o país invadiu, con limpiezas etnicas, mortaleras masivas, violación y saqueyo, impresionó més a la opinión publica europea que a guerra d'independencia de Croacia por haber-ie un refirme estausunidense a lo gobierno musulmán de Bosnia, refirme que compensó as reticencias d'os países europeus a lo que consideraban una extensión d'os procesos secesionistas en Europa.
Preliminars[editar | modificar o codigo]
Quan o principio d'a guerra d'independencia crovate encomenzó una tensión en Bosnia-Herzegovina, os bosniacos musulmans y os crovates deseyaban a independencia y os serbos s'oposoron a esta independencia. Bi habió una declaración de sobiranía o 15 d'octubre de 1991. Se contempló a ideya d'a partición de Bosnia en tres partz, ideya a la que s'oposoron os bosniacos os musulmans. O 9 de chinero de 1992 l'Asembleya d'o pueblo serbisco de Bosnia y Herzegovina adoptó una declaración que proclamaba a Republica Serbisca de Bosnia y Herzegovina (SR BiH).
Encomienzo d'a guerra[editar | modificar o codigo]
Os días 29 de febrero y 1 de marzo de 1992 se fació un referendum pa votar sobre a independencia de Bosnia-Herzegovina con una participación d'o 64% por haber estau boicoteyau por os serbos de Bosnia y Herzegovina. O resultau estió d'o 98% a favor d'a independencia y a Republica de Bosnia y Herzegovina esdevinió un estau independient o 3 de marzo de 1992. Os serbos reaccionoron formando tamién en marzo a Republica Serbisca de Bosnia-Herzegovina con a intención d'estar unificada con Serbia.[1]
A tensión creixió y entre marzo y abril se producioron riotas y asesinatos y en abril de 1992 esclató la guerra entre serbos y independentistas bosniacos en Sarajevo, estendendo-se a guerra por buena part d'o país[1].
L'agresión serba[editar | modificar o codigo]
A Republica Serbisca de Bosnia y Herzegovina encomenzó a prener o control d'as zonas de mayoría serba y atacó tamién zonas con muita población serba como Sarajevo (a ciudat ye de mayoría musulmana pero os lugars d'a redolada no), Posavina (de mayoría crovata pero necesaria pa dar continuidat territorial a los serbos), y ciudatz grans de Bosnia oriental de mayoría musulmana.
En a zona de Bosnia oriental cerca d'a muga os musulmans no podioron controlar que bells enclaus como Goražde, Srebenica, Zepa, ecetra... A lo principio os crovates luitaban contra os serbos chunto con os bosniacos musulmans y prenioron o control d'Herzegovina occidental y muitas localidatz de Bosnia Central de mayoría crovate u de mayoría musulmana como Kiseljak. Os refuchiaus musulmans d'atras zonas facioron que aumentás o porcentache de población musulmana en puestos como Mostar.
O 22 de mayo de 1992 a Onu reconoixió a Bosnia-Herzegovina independient, pero en ixos días os serbos y crovates negocioron en secreto a partición de Bosnia[2].
Mientres os bosniacos musulmans, que no s'heban preparau pa a guerra, no podeban recuperar as zonas que perdeban y tendeban a reblar, os crovates manteneban as suyas posicions y comenzoron a funcionar d'una traza cada vegada més autonoma con respecto a lo gobierno bosnián, plegando a fer treguas con os serbos.
Guerra crovate-bosniaca[editar | modificar o codigo]
Encara que se considera que a guerra crovate-bosniaca encomenzó en chunio de 1992, en a santmigalada de 1992 se producioron primers enfrentamientos greus entre bosniacos y crovates. En octubre de 1992 Bosanski Brod cayó en poder d'os serbos y con ixo consiguioron asegurar-sen o corredor de Posavina entre Banja Luka y Bosnia oriental.
En octubre de 1992 Jajce cayó en mans d'os serbos dimpués de combates entre crovates y bosniacos musulmans por o control de Bosnia central[2].
En chinero de 1993 o plan Vance-Owen proposó a división de Bosnia-Herzegovina en 10 provincias autonomas, 3 de bosniacas (Bihać, Zenica y Tuzla), 3 de crovatas (Mostar, Kupres y Posavina) y 3 de serbiscas (Bosnia occidental, Bijeijna y Herzegovina oriental) y una común (Sarajevo). Os serbos no acceptoron y a guerra continó. Tamién en chinero de 1993 bi habió violentos combates entre crovates de Bosnia-Herzegovina y tropas musulmanas.[2]
Se succdioron plans de paz que no se aceptoron y altos o fuego que no se respectoron. A Unión Europea se mostró un intermediario ineficient y iba estando sustituita por Estaus Unius. O principal d'a guerra yera o enfrentamiento de crovates y bosniacos en Bosnia central. A guerra yera perén en Gornji Vakuf. En chunio de 1993 bi habió una ofensiva bosniaca en Travnik contra os crovates,[2] os crovates pierden a ciudat y se refuchian en territorio ocupau por os serbos. En octubre de 1993 bi ha atra ofensiva bosniaca en Vares en a que os crovates fuyen d'a ciudat perdida.[2] O 28 d'agosto de 1993 se constituye oficialment a Republica Crovata de Herzeg-Bosnia. Os serbos, que ya teneban lo que quereban se limitaban a ir ocupando as ciudatz que resistiban aisladas en Bosnia oriental u a abanzar por Bosnia Central aproveitando que i luitaban os crovates y musulmans.
Os bosniacos yeran més numerosos y poquet a poquet prenioron o control de muitas localidatz de Bosnia central. En Bosnia central os serbos y crovates yeran aliaus pero en Herzegovina os serbos yeran aliaus d'os musulmans. En Bihać os bosniacos musulmans locals s'heban declarau autonomos con respecto a lo gobierno bosnián de Sarajevo, tenioron o refirme d'os serbos y encomenzó una guerra en a que as autoridatz de Sarajevo forachitoron a los bosniacos autonomistas.
Fin d'a guerra[editar | modificar o codigo]
Estaus Unius y a Unión Europea replanteyoron a qüestión con o prochecto de formación d'una federación crovata-musulmana y forzoron que os crovates y bosniacos continasen chuntos, (encara que a guerra entre os dos bandos tardó en aturar-se). Con os dos bandos chuntos i habió primero unos abances en Bosnia oriental y central. Os abances en Bosnia central se facioron cerca de Tuzla. Os abances en Bosnia central se facioron en a Operacija Cincar, en a que se prenió a ciudat de Kupres o 3 de noviembre de 1994.
En chulio de 1995 os serbos prenioron Srebenica y fazioron una gran mortalera, (més rapida y gran que as atras que heban feito en atras ciudatz de Bosnia oriental). Por ixos mesmos tiempos se produció a Operacija Ljeto '95 u "operación verano de 1995", en a que l'exercito crovate de Bosnia y l'exercito crovate abanzoron por Bosnia occidental cerca d'a muga pa aislar a capital de Krajina (Knin).
En agosto de 1995 a guerra cambió de tot. Os crovates heban recuperau Krajina en a operación Oluja y os bosniacos de Bihać ya no yeran rodeyaus de serbos, por o que podioron abanzar enta l'este. Un nuevo atentato en Sarajevo estió motivo pa que a Otan bombardeyase as posicions serbas arredol de Sarajevo. Os crovates de Bosnia central abanzoron por a meseta de Kupres y recuperoron Jajce en a Operacija Maestral ("Operación Mistral"). Os bosniacos de Bosnia central tamién abanzoron enta l'ueste y ocuporon enclaus serbos que i heba en a mesma Bosnia central, devez que os bosniacos de Bihać abanzoron ta l'este en a Operacija Sana ("Operación Sana"). Os serbos d'a redolada de Banja Luka reaccionoron con més expulsions y mortaleras.
Estaus Unius forzó que o 21 de noviembre de 1995 se firmase a paz de Dayton[1], que dividió o estau Bosnián en dos entidatz pseudoestatals: a Federacija Bosne i Hercegovine (Federación de Bosnia y Herzegovina y a Republika Srpska (Republica Serbisca).
Referencias[editar | modificar o codigo]
- ↑ 1,0 1,1 1,2 (fr) Dennis P. Hupchick, Harold E. Cox: Les Balkans. Atlas historique. Ed Economica, 2008. p 110.
- ↑ 2,0 2,1 2,2 2,3 2,4 (es) Carlos Taibo, José Carlos Lechado Los conflictos yugoslavos: una introducción. Editorial Fundamentos 1993, p 197-200.
Bibliografía[editar | modificar o codigo]
- (en) Mark Mazower: The Balkans: From the End of Byzantium to the Present Day (Phoenix, 2002).
- (en) Jozo Tomasevich: War and Revolution in Yugoslavia, 1941-1945. Stanford University Press, 2001.
- (fr) Dennis P. Hupchick, Harold E. Cox: Les Balkans. Atlas historique. Ed Economica, 2008.
- (es) Carlos Taibo, José Carlos Lechado Los conflictos yugoslavos: una introducción. Editorial Fundamentos 1993
- (es) Francesc Bonamusa: Pueblos y naciones en los Balcanes. Siglos XIX y XX. Akal 2010, p 78-82.
- (es) Felipe Fernández-Armesto: Los hijos de Zeus. Pueblos, etnias y culturas de Europa. 1996 Grijalbo.
- (es) André Sellier, Jean Sellier: Atlas de los pueblos de Europa Central. Acento editorial.
Vinclos externos[editar | modificar o codigo]
Se veigan as imachens de Commons sobre a Guerra d'independencia de Bosnia-Herzegovina.
