Guardafuents
Guardafuents ye una denominación popular de qualques especies d'anfibios en a orden Urodela que, anque en a epoca reproductiva pueden ganar colors vitariscas, presentan a piel de colors discretas en a més gran parte de l'anyada (marrón, verdisca u grisa), destinguindo-se d'as zalamandras per no presentar a carateristica color negra d'éstas.
Anque popularment se fa destinción, no bi ha garra esferencia a nivel de clasificación zoolochica d'entre os guardafuents y as zalamandras, pus «zalamandra» se considera un termino sinonimo d'«urodelo». Per ixo, os «guardafuents» tecnicament serían un tipo de «zalamandras», anque a denominación popular remane per as diferencias fisicas (y més que més, de pigmentación) d'entre as especies animals que se denominan con un y con l'altro nombre.
O nombre popular dimana d'os puestos a on que se's gosa trobar, pos anque no son de tot aquaticos, como totz os urodelos que habitan en ambients mediterranios tienen una fuerte dependencia de l'augua, y ye normal trobar-los en barrancos, cequias, rigachuelos, vivers, fuents y cumos d'augua lempida. Se's considera animals indicadors de buena calidat de l'augua, car no subsisten en auguas contaminatas.
Qualques especies, en a epoca reproductiva, incrementan as colors sobretot en os masclos con a finalidat d'exercitar a parada nuncial. Qualcunas presentan dica crestas en a esquerna y a coda que difuera d'ixa epoca no tienen.
Imachens[editar | modificar o codigo]
Guardafuents pirenenco (Calotriton asper)
Masclo de Triturus vulgaris con a libreya nuncial.
Forma larvar de Pleurodeles waltl
