Terminación -uela (toponimia)

A Terminación -uela ye común en a toponimia aragonesa (en concreto a provincia de Teruel), encara que ye present en muitas atras zonas. Se relaciona con o sufixo -uelo, y ye un claro derivato d'o sufixo latín -OLUS. Indica lugars chicotz y se fa servir pa creyar diminutivos toponimicos.

Pa bells autors ye un diminutivo aplicato a un lugar que primero se diciba sin de diminutivo, esto podría estar lo caso de Cerveruela, que apareixe en qualques fuents antigas como Cervera.

Pa belatros ye una fosilización d'o diminutivo latín -olus en toponimos referitos a lugars chicotz u villas romanas por on pasaban vías romanas. Manimenos os eixemplos que da son Aldehuela, Rubielos, La Iglesuela, Escorihuela, Mosqueruela y Nogueruelas, estando clarament d'orichen medieval y aragonés os dos zagueros (diminutivos de Mosquera y Noguera, y que tamién podemos trobar en atras partz d'Aragón). Por atra part Aldehuela ye a forma actual d'Aldeyuela, que se remonta a l'arabe Aldeya, estando tamién medieval.

En a toponimia tamién se troba a forma masculina d'este sufixo, como en "Teruel", "Pallaruelo", "Pozuelo"/"Pozuel", "Pedruel", "Rubiuelos", pero no tan a sobén.

En os documentos medievals a sobén amanixen latinizatos con -ola, y a vegatas como olla marcando una l cheminata por hipercorrección grafica, pero que en os casos de "Rubiellos" pueden esplicar-se por influencia ortografica d'o catalán, on se prenuncia una l cheminata dezaga de e u i, (clorofil·la, goril·la).

O diftongo -ue- desembolica dezaga d'una -r- una pronunciación /güé/, como en /Esquirgüelo/ u /Zirgüello/, pronunciación que no siempre ye posible de testimoniar en os textos antigos y a vegatas ye marcata con una -h-, (Cabrihuel, Terhuel, Noguerhuelas, Ruvihuelos). D'alcuerdo con as normas ortograficas de l'Academia de l'Aragonés esta g no s'escribe: Esquiruelo, Teruel, ecetra.

Lista de toponimos con sufixo -uela en Aragón

• Abechuela.
• Argualas (forma con fonetica aragonesa arcaica, equivalent a Eruelas en aragonés cheneral).
• Veruela.
• La Escaliuela.
• Ceresuela.
• Cerveruela.
• Cosculluela.
• Esteruelas.
• Ferreruela.
• Figueruelas.
• La Iglesuela.
• Lagueruela.
• Lanzuela.
• Mosqueruela.
• Moyuela.
• Nogueruelas.
• Royuela.
• Sarzuela de la Loma.

Lista de toponimos con sufixo -uela cerca d'Aragón

• Las Griguelas.

Veyer tamién

• Sufixo -uelo