Cobol

O cobol (de l'alemán Kobold, esprito d'a mitolochía chermanica) ye un elemento quimico de numero atomico 27 y simbolo Co situato en o grupo 9 d'a tabla periodica d'os elementos. O cobol ye un metal duro, ferromagnetico, de color blanco azulenco. A suya temperatura de Curie ye de 1388 K. Por un regular se troba chunto con o níquel, y o dos gosan fer parti d'os meteoritos de fierro. Ye un elemento quimico esencial ta os mamifers en chicotas cantidatz. O Co-60, un radioisotopo de cobol, ye un important trazador y achent en o tractamiento d'o cáncer. O cobol metalico ye comunment constituyito d'una mezcla de dos formas alotropicas con estructuras cristalinas hexagonal y cubica centrata en as caras estando a temperatura de transición entre as dos de 722 K. Presenta estatos d'oxidación baixos. Os compuestos en os que o cobol tien un estato d'oxidación de +4 son poco comuns. O estato d'oxidación +2 ye muit freqüent, asinas como o +3. Tamién bi ha complexos importants con o estato d'oxidación +1.

Aplicacions

• Aleyacions entre as que cal destacar as superaleyacions emplegatas en turbinas de gas d'aviación, aleyacions resistents a la corrosión, acers rapedos, y carburos cementatos y aines de diamant.
• Imans (AlNiCo) y cintas magneticas.
• Catalisi d'o petrolio y industria quimica.
• Recubrimientos metalicos por deposición electrolitica por o suyo aspecto, dureza y resistencia a la oxidación.
• Ixecant ta pinturas, vernices y tintas.
• Recubrimiento base d'esmaltes vitrificatos.
• Pigmentos (cobol azul y cobol verde).
• Electrodos de baterías electricas
• Cordons d'acero de pneumaticos.
• L'isotopo Co-60 se fa servir como fuent de radiación gamma en radioterapia, esterilización d'alimentos (pasteurización freda) y radiografía industrial ta o control de calidat de metals.

Rol biolochico

O cobol en chicotas cantidatz ye esencial ta numerosos organismos, encluyitos os humans. A presencia de cantidatz entre 0,13 y 0,30 ppm en a tierra amillora ostensiblement a salut d'os animals de pasto. O cobol ye un component central d'a vitamina B12 (cianocobalamina).

Abundancia y obtención

Mena de cobol

O metal no se troba en estato nativo, sino en diversos minerals, razón por la que se quita usualment chunto con atros productos, mas que mas como subproducto d'o níquel y l'arambre. As prencipals menas de cobol son a cobaltita, eritrina, cobaltocalcita y skuterudita.

Os mayors productors de cobol son China, Zambia, Rusia y Australia. En o termin municipal de Sant Chuan de Plan bi habió una mena de cobol a man d'o barranco d'el Sen y o puesto encara se diz El Cobol.

Compuestos

A causa d'os diversos estatos d'oxidación que presenta, bi ha un abundant numero de compuestos de cobol. Os oxidos CoO (temperatura de Neel 291 K) y Co₃O₄ (temperatura de Neel 40 K) son os dos antiferromagneticos a baixa temperatura.

Articlos relacionatos

• Azul cobol

Vinclos externos

• (es) Enciclopedia Libre - Cobol
• (en) Los Alamos National Laboratory - Cobol
• (en) webelements.com - Cobol
• (en) environmentalchemistry.com - Cobol
• (en) Londres celebra 50 anyos de Radioterapia con Cobol-60 (pdf)