Hierba

Conyza canadensis, una hierba.

Una hierba (pronunciau /'jerba/, como "yerba"; d'o latín <HERBA) u planta herbacia ye qualsiquier planta pertenecient a una especie no lenyosa, con una altaria comprendida d'entre bells centimetros y no mas d'1,5 metros aproximadament. Quan una planta presenta ixas caracteristicas, se diz que tiene port herbacio.

A mayor parte de a biodiversidat de plantas superiors que i ha en o planeta Tierra son especies no lenyosas que pueden decir-se hierbas. En bells climas y ecosistemas terrestres representan un porcentache elevadismo d'as plantas presents, por o que a suya importancia ye cabal.

Anque no ye una condición decisiva ta considerar que una planta ye hierba, muitas d'as especies que popularment se conoix asinas son anyals u bianyals y cumplen o suyo ciclo biolochico en una anyada. A sobén creixen vivament en os meses d'oraches favorables, pero se les ixecan as partes aerias en a estación mas cruda, no quedando sique as estructuras soterranias de resistencia (radices, bulbos u tuberclos) que les permiten tornar a brostar quan as condicions tornan a estar favorables.

Bellas especies, con un ciclo estrictament anyal, creixen, fan a florada, fructifican y mueren en semanas u meses, adintro d'una mesma anyada. En istos casos, os percullos que amaneixen a la siguient estación de creiximiento son os nuevos pietz, naixius de simients, que pertenecen a la siguient cheneración.

Se veiga tamién

• Árbol
• Arbusto