Cristianismo

O cristianismo ye una relichión monoteísta que se fundamenta en a vida y las amostranzas de Chesús de Nazaret, recullidas en o Nuevo Testamento por os evanchelistas. Ye la mayor relichión d'a Tierra, con alto u baixo 2.100 millons de practicants, lo que representa cuasi un tercio d'a población humana. Comparte con o chudaísmo lo Tánakh, clamau como Antigo Testamento por os cristianos. Por ista razón ye a vegadas clamada como una relichión abrahananica, chunto a lo chudaísmo y a l'islam.

Brancas d'o cristianismo

As diferents brancas d'o cristianismo han amaneixiu dende lo mesmo suyo orichen. A mes antiga son os ebionitas, que creyeban en a fegura de Chesús pero sin deixar de seguir a lei y ritual propios d'o chudaísmo, por o que no acceptoron a sant Pavlo. Tamién i habió wn ixas envueltas sectas que combinaban cristianismo y gnosis.

Belunas d'as ilesias orientals tienen o suyo orichen en as luitas por o poder entre bispes, cuan uns conseguiban imponer os suyos criterios en os concilios, y atros no los acceptaban, independizando-se y convertindo-se en hereches pa lo cristianismo oficial. Pa pueblos sozmesos a los romanos la herechía ha estau un camín pa expresar o deseyo d'independencia u la independencia (nacionalismo relichioso); como ye lo caso d'a Ilesia Copta u d'a Ilesia Siriana. O proceso d'expansión d'o cristianismo fueras de l'Imperio Romano permitió la expansión tanto de formas de cristianismo que obedeixeban a Roma u a Costantinoble como de formas hereticas. As formas no ortodoxas u herechías permitiban a los recient convertius desligar-sen d'o poder imperial, fer ilesias nacionals u no ser perseguius en países enemigos de Roma: Ilesia Arriana, Ilesia Armenia, Ilesias Celtas, Ilesia Asiriana, etc...

A rivalidat entre la hierarquía de Roma y Costantinoble produció un proceso contino de deseparación que remató en o sieglo XI:

Catolicismo, a mayor d'as brancas cristianas, que accepta l'autoridat centralizada d'o papa, en Roma.
Ortodoxia, con a Ilesia Ortodoxa Griega, a Ilesia Melkita y bella ilesia autocefala d'os Balcans, países eslaus y Cheorchia.

Dende ixas envueltas d'as Cruzadas y d'a decadencia de l'Imperio Bizantín Roma ha conseguiu que parte d'os fidels d'as ilesias orientals haigan acceptau l'autoridat de Roma, encara que tamién mantenendo lo suyo rito propio, convertindo-se asinas en lo que se conoixe como "ilesias uniatas", en oposición a las ilesias orientals que no acceptan l'autoridat papal y que se conoixen como "ilesias ortodoxas".

Toz os maronitas acceptoron a lo papa de Roma, convertindo-se asinas en uniatas.
Parte d'os armenios acceptoron l'autoridat papal, sobretot en tiempos d'o Reino d'Armenia la Chica, un reino que estio aliau d'os cruzaus.
Parte d'a Ilesia Asiriana, seguidora d'o nestorianismo, aceptó a lo papa de Roma en o sieglo XVI, orichinando en consecuencia la Ilesia Caldea.
Parte d'a mingua Ilesia Siriana acceptó a lo papa de Roma, orichinando la Ilesia Catolica Siriana.
Os cristianos de rito griego que acceptoron en diferents contextos historicos a lo papa de Roma son conoixius como greco-catolicos. En Grecia siempre han estau pocos y fuoron perseguius. En cambio, una parte sustancial d'os cristianos de rito griego acceptoron a lo papa de Roma en l'antiga Unión Polaco-Lituana, en Transilvania (Ilesia Uniata d'Alba Iulia), y en Orient Meyo.

As crisis baixomedievals y los cambios socioeconomicos de dimpués d'a Edat Meya facioron que en cualques países d'Europa que deseyaban desligar-sen de Roma prenesen versions d'o cristianismo diferent d'o catolicismo, mirando en a radiz biblica y orichinando una succesión d'ilesias diferents a lo largo d'os sieglos.

Protestantismo, formau por multiples ilesias independients, que no reconoixe la supremacía papal.
Restauracionismo, formau por os Testimonios de Chehová, una escisión d'os Adventistas d'o seteno día y la Ilesia Mormona, entre d'atros.

Bibliografía

Isaac Asimov: Guía de la Biblia: Nuevo Testamento. Plaza & Janés Editores, S.A. ISBN 978-84-01-45083-9.
Isaac Asimov: Guía de la Biblia: Antiguo Testamento. Plaza & Janés Editores, S.A. ISBN 978-84-01-45082-2.

Se veiga tamién

Vinclos externos

Se veigan as imáchens de Commons sobre o cristianismo.
(es) Biblia en audio, (en mp3).

Datos: Q5043
Multimedia: Christianity / Q5043