Celsa

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Celsa
Colonia inmune romana
Entidat  • País  • Provincia	Colonia inmune Sedetania Hispania Tarraconensis
Coordenadas	41°22’25’’N 0°26’ 6’’U
Habitants	Ibers
Pueblo	Sedetans u ilerchez
Actual	Viliella d'Ebro
Periodo	44 aC-III

Celsa u Colonia Celsa (en escritura iberica , en latín Colonia Iulia Victrix Celsa) ye o nombre d'una colonia de ciudadans romanos fundada en o termín municipal de l'actual Viliella d'Ebro por Marco Emilio Lepido en l'anyo 44 a. C. y que fue albandonada poco dimpués d'o 70 d. C., probablement por a marcha d'os suyos habitants enta a ciudat mas important de Caesaraugusta.

Moneda de bronce cudida en Kelse en o siglo II aC, que amuestra o nombre d'a ciudat en luengua ibera.

Hercules con a clava y chabalín d'Erimanto.

Fue declarada Molimento historico-artistico perteneixient a o Tresoro Artistico Nacional por decreto de 3 de chunio de 1931 con o nombre de «Ruinas romanas en Viliella d'Ebro». Actualment, ye considerada como Bien d'Intrés Cultural.

Historia

Celsa ye a primera fundación en a val de l'Ebro d'una colonia inmune de ciudadans libres romanos. Fue fundada con o nombre de Colonia Victrix Iulia Lepida en honor a Lepido, o suyo fundador, pero en l'anyo 36 a. C. cayó en desgracia, y a ciudad romana cambeó o suyo nombre por o de Colonia Iulia Victrix Celsa, latinizando o nombre d'a probable antiga ciudat iberica sobre a que se situó, Celse (pronunciau /kelse/) u Kelse (en escritura ibera ). Yera ista una important ciudat ilerchet u bien sedetana que cudió moneda iberica d'archent, estando a unica ceca iberica sedetana que cudió monedas d'iste metal.

En l'actualidat ye un important chacimiento arqueolochico dependient d'o Museu de Zaragoza, que poseye en iste enclau una d'as suyas seccions. S'estendilla por una superficie d'alto u baixo cuaranta hectarias chunto a o río Ebro.

Presenta un conchunto de terrazas urbanizadas y o muelle d'un puerto fluvial, amás d'una necropolis, un forno de pan y cuantas casas y villas d'importancia, como a «Casa d'os delfins» (u insula I) —con pavimento de mosaico de tipo opus signinum (teselas embutidas en mortero), atrio y triclinio—, u a insula VII, que comprende a dita «Casa d'Hercules», la d'o «emblema blanco y negro» y la d'a «tortuga».

Entre as troballas de biens arqueolochicos muebles, destaca a presencia de kalathoi (recipients ceramicos en forma de sombrers de copa), de factura iberica u celtibera, si bien no se puet guaranziar totalment que perteneixesen a la Kelse iberica u estasen o producto d'os intercambios comercials d'a ciudad romana con os pueblos indichenas d'a suya redolada. Tamién apareixen ceramicas italicas, como vasillas d'estilo campaniense, lucernas u anforas.

Tamién se conservan restos de pintura que decoraban as parez de belunas d'as cambras mayors con pinturas d'o III estilo romano, en que i apareixen cisnes, grecas florals, nereidas u tritons. En a «Casa d'Hercules» se representan frescos con episodios d'os suyos treballos, de II estilo pompeyano (o Lión de Nemea, a Cierva de Cerinia, los Muixons d'o Estinfalo...) y un retrato d'o propio heroi.

Bibliografía

• Beltrán Lloris, Miguel y Guillermo Fatás Cabeza, «Celsa, anuncio de César Augusta», Historia de Zaragoza, vol. 1. Salduie, ciudad ibérica, Zaragoza, Ayto. de Zaragoza - Caja de Ahorros de la Inmaculada, 1998, págs. 85-91. ISBN 84-8069-133-6.
• Voz «Celsa», Gran Enciclopedia Aragonesa en línea.

Vinclos externos

• Se veigan as imáchens de Commons sobre Celsa.
• (es) G.E.A. Conquista de Roma d'o territorio aragonés
• (es)Atlas de l'imperio romano
• (es) Zaragoza romana, Diputación Provincial de Zaragoza.
• Guía d'o Museu de Zaragoza

• Datos: Q5760255
• Multimedia: Celsa (Roman City) / Q5760255