Ciudat independient
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
En Alemanya, una ciudat independient u ciudat libre de districto (en alemán kreisfreie Stadt) ye o nombre que se da en Alemanya a las ciudatz que tienen o suyo propio gubierno. Dito gubierno d'a ciudat ye independient de tot d'o gubierno d'o siguient livel d'autoridat, o districto (en alemán Landkreis). Actualment, a mayoría de ciudatz que tienen iste estatus son grans ciudatz con 100.000 u mas habitants. En muitos casos o títol s'ha concediu historicament, lo que fa que muitas grans ciudatz de mas de 100.000 habitants no tiengan iste estatus, asinas Recklinghausen u Göttingen (as dos con mas de 120.000 habitants) fan parti d'un Landkreis y no son ciudatz libres.
A ciudat mas chicota con ista mena d'estatus ye Zweibrücken con bells 35.000 habitadors, mientres que a ciudat mas gran ye Múnich, con mas d'1,3 millons. Hamburgo y Berlín tienen mas población que ista zaguera, encara que no se consideran ciudatz libres de districto por estar ciudatz estau. Un atra curiosidat ye o estau de Bremen, formau por dos ciudatz libres de districto (en alemán kreisfreie Städte), a ciudat de Bremen, y a ciudat de Bremerhaven, a bells 60 km a o norte d'a primera. Alto u baixo meyo millón de personas viven en Bremen (1,5 millons en a suya aria metropolitana) y bells 117.000 en Bremerhaven.
Bi ha tamién bellas ciudatz ditas Große selbständige Stadt (en aragonés Ciudat con gran soberanía) que, encara que no'n fan parti, nomás son responsables de chestionar o suyo districto. Todas ellas se troban en o estau d'a Baixa Saxonia y son Celle, Cuxhaven, Goslar, Hameln, Hildesheim, Lingen, y Lüneburg.
Conceptos parellanos a las kreisfreie Stadt son as "autoridatz unitarias" (en anglés unitary authority) en o Reino Uniu, u as "ciudatz independients" (en anglés independent city) en os Estaus Unius.
En 2013 yeran 110 as ciudatz que tenian iste títol, a mayor parti grans ciudatz que tienen historicament una tradición d'autonomía administrativa.