Ir al contenido

Chesús Yuste Cabello

De Biquipedia
Chesús Yuste Cabello
Chesús Yuste Cabello

7 de chulio de 1999 – 20 de chunio de 2011
13 d'aviento de 2011 – 2 de chulio de 2014
Naiximiento 6 d'aviento de 1963
Zaragoza (Aragón)
Partiu Chunta Aragonesista
Profesión Politico, escritor, tecnico de comunicación
Alma Máter Universidat de Zaragoza

Chesús Yuste Cabello (Zaragoza, 6 d'aviento de 1963) ye un escritor y politico aragonés miembro d'o partiu politico Chunta Aragonesista, d'o que estió secretario cheneral. Ha estau deputau por a provincia de Zaragoza tanto en as Corz d'Aragón como en o Congreso d'os Deputaus.

Datos personals

[editar | modificar o codigo]

Naixiu y criau d'a ciudat de Zaragoza (Aragón), dimpués d'os suyos estudios segundarios en o colechio A Salle-Gran Vía d'a capital aragonesa, cursó a carrera d'Historia y Cheografía en a Universidat de Zaragoza, a on se licenció en a materia.[1] Ha treballau como tecnico en comunicación.

Actividat politica

[editar | modificar o codigo]
Chesús Yuste (de piet en o centro) mientres a I Asambleya Nacional de CHA, en 1986.

De profundas ideyas aragonesistas y progresistas, fació parti chunto a un centenar de personas d'a fundación d'o partiu politico Chunta Aragonesista (CHA) o 29 de chunio de 1986. Encabezó a candidatura d'o suyo partiu por a provincia de Zaragoza en as eleccions a o Congreso d'os Deputaus de 1993, conseguindo uns resultaus radius que le privoron d'estar eslechiu, pero que duplicaban los que heba conseguiu o partiu en 1989.[2] Dimpués d'asumir cuantas responsabilidaz internas, a IV Asambleya Nacional de CHA de chinero de 1995 le eslichió vicesecretario cheneral.[3][2] Bels meses dimpués, en as eleccions a Corz d'Aragón de 1995, fue eslechiu como un d'os dos primers representants de Chunta en as Corz,[2] cargo que revalidaría succesivament en as eleccions de 1999, 2003 y 2007.[4]

A V Asambleya Nacional de 1998 le designó secretario cheneral,[3][2] cargo que desempenyó dica a VI Asamblea de 2001.[3] Estió chustament mientres o suyo mandato cuan o partiu consiguió dentrar por primera vegada en o Congreso en resultar trigau deputau José Antonio Labordeta en as eleccions de 2000.[5]

En as eleccions rechionales de 2011 no se presentó como candidato,[6] metendo asinas fin a un dilatau período de 16 anyadas como representant en o parlamento aragonés.[7] Manimenos, pocos meses dimpués tornó a encabezar a candidatura provincial en as eleccions a o Congreso d'os Deputaus de 2011, ista vegada formando CHA coalición con Ezquierda Unida. En ista ocasión sí consiguió estar eslechiu para a decena lechislatura,[8] encara que o pacto entre as dos formacions establiba que heba de renunciar a o cargo en pasar 31 meses en favor d'o segundo candidato y miembro d'Ezquierda Unida, Álvaro Sanz.[9] Adintro d'o Congreso, s'integró en o grupo parlamentario de La Izquierda Plural, formau por os representants d'Ezquierda Unida, Iniciativa per Catalunya Verds y Chunta Aragonesista.[10] A suya intensa actividat parlamentaria motivó que cuantos medios le sinyalaran como «o deputau mas activo».[11][12]

Entre as suyas muitas actividaz como deputau estió la d'estar miembro y coordinador de l'Asociación Parlamentaria en Esfensa d'os Animales (APDDA), una organización que integra a parlamentarios de diferents fuerzas politicas preocupaus por a protección d'os animals. Entre as diversas iniciativas planteyadas ye a propuesta de retirar a categoría de Fiesta d'Intrés Turistico Nacional a o Torneyo d'o Toro d'a Vega.[13]

Yuste renunció a la suya acta de deputau en chulio de 2014 en virtut d'o pacto electoral sinyau por o suyo partiu con Ezquierda Unida. A suya despedida d'a cambra veyió como una parti d'a suya zaguera moción yera refirmada por o Congreso por unanimidat.[14]

A suya larga trachectoria desempenyando tanto cargos internos como electos le convirtió en un d'os líders mas representativos de Chunta Aragonesista.[5]

Actividat creativa

[editar | modificar o codigo]

Publica en Internet «El blog de Chesús Yuste», a on difunde as suyas ideyas politicas.[15] Simultaniament, publica en o mismo medio o blog «Innisfree», a on manifiesta a suya pasión por Irlanda, país con o que tien estreitos lazos.[16] Iste zaguero fue considerau por Lonely Planet Magazine, publicación en espanyol d'a editorial especializada en libros de viaches Lonely Planet, como «o blog en espanyol mas completo sobre Irlanda».[17]

Libros de ficción publicados:

  • La mirada del bosque (Paréntesis, Sevilla, 2010), novela policiaca ambientada en a Irlanda rural.[18][19][20]
  • Regreso a Innisfree y otros relatos irlandeses (Xordica, Zaragoza, 2015), volumen de relatos curtos tamién ambientaus en Irlanda.[21]
  • Asesinato en el Congreso (Xordica, Zaragoza, 2017), novela negra ambientada en a suya experiencia como deputau en as Corz Chenerals.[22][23][24]
  • La memoria de la turba (Xordica, Zaragoza, 2020), novela policiaca ambientada en Irlanda, ye o segundo libro d'a serie que prencipió en La mirada del bosque.
  • Jaque al reino (Doce Robles, 2022), novela historica sobre a condesa donya Sancha d'Aragón, que gosó estar nombrada "Obispa" de Pamplona en 1082.

En obras colectivas:

  • Los Borbones en pelota (Olifante, Zaragoza, 2014): 93 autors de hue comentan as 93 laminas satiricas a tot color, en as que se caricaturizaba y ridiculizaba a personaches d'a reyaleza, o gubierno y l'aristocracia d'a epoca d'o reinau de Isabel II.
  • Cuando brote la cebada en las cunetas, en AA.VV., Relatos de la memoria herida (Desmemoriados/La Vorágine, Santander, 2019). Ye un relato sobre a memoria democratica en relación con a guerra civil espanyola y a postguerra.
  • Resistir es vencer, en AA.VV., Alarma. Relatos desde el confinamiento (Imperium Ediciones, Zaragoza, 2020).

Libros de no ficción:

  • Monasterios del Alto Aragón I (PRAMES, Zaragoza, 2020).
  • Monasterios del Alto Aragón II (PRAMES, Zaragoza, 2020).
  • Navatas y navateros (PRAMES, Zaragoza, 2021).

Referencias

[editar | modificar o codigo]
  1. ↑ (es) La representación aragonesa en el Congreso. Heraldo de Aragón, 20 de noviembre de 2011
  2. ↑ 2,0 2,1 2,2 2,3 (es) Nuestra Historia. Consolidación del aragonesismo de izquierdas (1991-1999). Chunta Aragonesista
  3. ↑ 3,0 3,1 3,2 (es) Los partidos de ámbito no estatal en Aragón: el Partido Aragonés y la Chunta Aragonesista. Óscar Barberà Aresté, Astrid Barrio López, Juan Rodríguez Teruel. Papers: revista de sociología, Num. 92, 2009. Pach. 171-195. ISSN 0210-2862.
  4. ↑ (es) Ficha personal de Chesús Yuste Cabello. Deputaus de todas as lechislaturas. Corz d'Aragón
  5. ↑ 5,0 5,1 (es) Chunta Aragonesista (CHA). Gran Enciclopedia Aragonesa
  6. ↑ (es) Ibeas y Martín lideran la renovación total de CHA en las listas de las Cortes y Zaragoza. No repetirán ni Chesús Bernal ni Chesús Yuste en el Parlamento. N. Asín. Heraldo de Aragón, 19 d'aviento de 2010
  7. ↑ (es) Chesús Yuste (La Izquierda Plural / CHA): "Se sigue más lo que hago aquí que lo que hice 16 años en las Cortes". P.P.A. El Periódico de Aragón, 12 de febrero de 2012
  8. ↑ (es) La Izquierda de Aragón celebra su escaño por todo lo alto. Alfredo Maluenda. Heraldo de Aragón, 20 de noviembre de 2011
  9. ↑ (es) IU y CHA rotarán en el Congreso si obtienen un escaño, pero confían en tener dos. Heraldo de Aragón, 5 de noviembre de 2011
  10. ↑ (es) IU aplaca a sus socios de grupo y Llamazares avisa: “No me callaré”. Vera Gutiérrez Calvo. El País, 15 d'aviento de 2011
  11. ↑ (es) Chesús Yuste, el diputado más activo en el Congreso. La Vanguardia, 27 de chulio de 2013. Europa Press
  12. ↑ (es) Chesús Yuste, el diputado más activo en el Congreso. ABC, 28 de chulio de 2013
  13. ↑ (es) Chesús Yuste se sumará a protesta contra el Toro de la Vega. El Periódico de Aragón, 12 de setiembre de 2013. EFE}}
  14. ↑ (es) El Congreso despide a Chesús Yuste, que cede su escaño en virtud del pacto CHA-IU. El Periódico de Aragón, 26 de chunio de 2014. EFE
  15. ↑ (es) El blog de Chesús Yuste. Chesús Yuste
  16. ↑ (es) Innisfree. Chesús Yuste
  17. ↑ (es) "Guía práctica para viajar a Irlanda". Lonely Planet Magazine. Marzo de 2009. Num. 19. Pach. 127. ISSN 1888-0479
  18. ↑ (es) Primera novela policíaca de Chesús Yuste. Lurdes Muñoz. El Periódico de Aragón, 22 de setiembre de 2010
  19. ↑ (es) Chesús Yuste publica una novela negra sobre Irlanda. Heraldo de Aragón, 23 de setiembre de 2010
  20. ↑ (es) Chesús Yuste, un creativo político de izquierdas. José Manuel Estévez-Saá. El Correo Gallego, 11 de chunio de 2011
  21. ↑ (es) El político y escritor Chesús Yuste publica su segunda novela, 'Regreso a Innisfree y otros relatos irlandeses'. Heraldo de Aragón. Europa Press, 17 de marzo de 2015
  22. ↑ (es) «Hago un reconocimiento a la gente que protestaba». El Periódico de Aragón
  23. ↑ (es) El ex diputado Chesús Yuste escribe una novela sobre un asesinato en el Congreso. El Mundo
  24. ↑ (es) Chesús Yuste: "Han ocurrido cosas que nadie creería en un reportaje: debía novelarlas". Laura Puy Muguiro. diariodenavarra.es

Vinclos externos

[editar | modificar o codigo]
Obteniu de "https://an.wikipedia.org/w/index.php?title=Chesús_Yuste_Cabello&oldid=2216407"