Cheminis (constelación)

De Biquipedia
Ir a la navegación Ir a la búsqueda
Cheminis
Gemini constellation map.png
Información cheneral
Abreviadura: Gem
Simbolo: Gemini.png
Nombre en latín: Gemini
Chenitivo: Geminorum
Significato: os cheminucos u meyos
Datos astronomicos
Ascensión recta: 7 h
Declinación: 20°
Vistero ta latitutz: entre -60° y +90°
Millor visibilidat: en febrero
Estrelas
con m.a. < 3:
4
Estrela mas luminosa: Pólux (β Gem)
 - Magnitut aparent: 1.1
Plevia de
meteoritos
:
Cheminidas
Cheminidas Rho
Constelacions
mugants:
Lupo cerbal (Lynx)
Auriga
Tauro
Orión (Orion)
Unicorni (Monoceros)
Can menor (Canis minoris)
Cancro (Cancer)

Cheminis[1] (en aragonés os cheminucos u meyos) ye una d'as constelacions d'o zodiaco, situada entre a constelación de Tauro a l'ueste y a de Cancro a l'este. A lo norte, se troban as constelacions d'Auriga y a quasi invisible d'o Lupo cerbal. A lo sud, as de l'Unicorni y o Can menor.

Caracteristicas[editar | modificar o codigo]

En ista constelación, bi son dos estrelas luminosas: Cástor (α), una estrela binaria telescopica (sextuple en l'actualidat), y Pólux, mas luminosa y ubicada mas a o sudueste. As altras estrelas son mas esmorteixidas -nomás que una, Alhena (γ), puede alufrar-se bella vez dende as grans ciudatz-, y debuixan un rectanglo enta o sudeste.

Tamién en ista constelación, en 1930, s'escubrió lo planeta Plutón, amán d'a estrela Wasat (δ Geminorum).

Obchectos[editar | modificar o codigo]

L'obchecto d'o cielo prefundo mas luminoso de Cheminis ye M35, un carrazo estelar ubierto de 5ª magnitut, a 2800 anyos luz d'a Tierra. Se troba a lo nordueste d'η Geminorum, cerca d'a marguin zurda d'a constelación.

Mitolochía[editar | modificar o codigo]

Representación medieval d'os Cheminucos

Parando cuenta en as estrelas poco luminosas visteras a simple uello, ista constelación pareix debuixar dos feguras alargadas paralelas. Ixo fació que s'identificase con o mito d'os clamaus Dioscuros, Cástor u Pólux, os fillos cheminucos de Leda. O mito d'istos meyos ye muito relacionau con o furto de ganau, y podría estar ligau a visions primitivas d'a Carrera de Sant Chaime u Vía Lactia, en as que serían situaus en metat d'o ganau u d'una rabanyera de vacas leiteras.

A orientación d'a constelación puede variar -ya que continan fendo lo debuixo de feguras alargadas igual si s'enclinan ta la dreita como ta la cucha-, anque s'acostumbra a veyer a os cheminucos decantaus enta man zurda. Manimenos, quan s'enclinan ta man dreita, un d'os cheminucos se troba en a Carrera de Sant Chaime y l'altro en ye difuera, o que fa que pareixca que un d'os meyos ye furtando lo ganau y que l'altro se lo mira. Ixo, chunto con a faixa d'o cielo que ye desenta (an que agora se considera que i son as nuevas y muito esmorteixidas constelacions d'a Chirafa y o Lupo cerbal) y as altras caracteristicas de l'aria de Cheminis (Orión, Auriga y Can Menor), podría haber estau l'orichen d'o mito d'os ueis de Cherión, un d'os dotze treballos d'Heracles.

Astrolochía[editar | modificar o codigo]

En l'astrolochía occidental, o signo de Cheminis (21 de mayo-20 de chunio) ye asociau con o elemento aire; ye, pues, un d'os tres signos d'aire, chunto con Libra y Aquario. En Cheminucos tien o suyo domicilio en lo planeta Mercurio. Ye un d'os quatre signos mutables, chunto con Virgo, Sachitario y Pisces. O suyo oposau ye Sachitario. D'entre as partis d'o cuerpo, os Cheminucos gubiernan os brazos y as mans.

As qualidatz que os astrologos acostumbran a acumular-li son os d'un carácter independient, adaptable, peligarcero y eloqüent, devez que dual, foricador, malestachero y niervudo.

En o "Libro d'o Trasoro" lo nombran como Gemjnjs, ye dicir "Cheminis".

los .xij.c signos, es a saber, Aries, Taurus, Gemjnjs, Cancer..

Referencias[editar | modificar o codigo]

  1. (an) Los nombres d'os signos zodiacals: Aries, Tauro, Cheminis, Cancro, León, Virgo, Libra, Escurpión, Sachitario, Capricorno, Aquario y Pisces. "Gramática basica de l'aragonés", Estudio de Filología Aragonesa. Prensas de la Universidad de Zaragoza. Pach. 40. ISBN 978-84-1340-204