Breca dichital

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre a Breca dichital. Ta atros usos d'iste termin, se veiga Breca (desambigación).

Porcentache d'uso d'Internet en 2012 en os diferents países d'o mundo

Breca dichital fa referencia a una totalidat socioeconomica entre aquellas comunidaz que tienen accesibilidat a Internet y aquellas que no, encara que tals desigualdatz tamién se pueden referir a todas as nuevas tecnolochías d'a información y a comunicación (TIC), como o computador personal, a telefonía móbil, a banda ampla y atros dispositivos. Como tal, a breca dichital se basa en diferencias previas a l'acceso a las tecnolochías. D'alcuerdo con Eurostat, a breca dichital consiste en a "distinción entre aquels que tienen acceso a Internet y pueden fer uso d'os nuevos servicios ofrius por a World Wide Web, y aquels que son excluyius d'istos servicios".

Iste termin tamién fa referencia a las diferencias que i hai entre grupos seguntes a suya capacidat ta utilizar as TIC de forma eficaz, a causa d'os distintos rans d'alfabetización, carencias, y problemas d'accesibilidat a la tecnolochía. Tamién s'utiliza en ocasions ta sinyalar as diferencias entre aquels grupos que tienen acceso a contenius dichitals de calidat y aquels que no'n tienen. O termin opuesto que s'emplega con mas frecuencia ye o d'inclusión dichital y o d'inclusión dichital chenuina. D'aquí s'extraye tamién o concepto de "infoexclusión" ta designar os efectos discriminatorios d'a breca dichital.

Historia

O concepto de breca dichital troba o suyo antecesor en o clamau informe O eslabón perdiu, que se publicó en 1982 por a comisión Maitland. Este metió de manifiesto as conclusions sobre a carencia d'infrastructuras de telecomunicacions en os países en vías de desembolique, metendo como eixemplo o telefono. O termin procede de l'anglés digital divide, utilizau entre l'administración Clinton, encara que a suya autoría no puede ubicarse con toda precisión. Mientres que en cualques referencias, se cita a Simon Moores como creyador d'o termin, Hoffman, Novak y Schlosser se refieren a Lloyd Morrisett como o primer que l'emplegó ta fer referencia a la fractura que podeba producir-se en os Estaus Unius entre «connectaus» y «no connectaus», si no se superaban as serias diferencias entre territorios, razas y etnias, clases y cheneros, por meyo d'inversions publicas en infrastructuras y aduyas a la educación.

En tot caso, entre ista administración se dio puesto a una serie de reportes publicaus baixo o titol Falling through the Net, en o que se deixaba evidencia d'o estau que iste fenomeno alzaba en a sociedat estadounidense en zaguerías d'o decenio de 1990. A partir d'iste orichen, cualques autors prefieren, o termin fractura dichital u estratificación dichital, por estar muito mas expresivos sobre o que realment significa. A traducción a atras luengas latinas, como o francés, tamién ha optado por o termin de fractura. Manimenos, a mayoría d'os autors hispanos se decanta por o de breca, mas suau y politicament correcto. Belatras expresions que han estau usadas ta referir-se a la breca dichital son «divisoria dichital», «breca inforcomunicacional» y «abismo dichital».

Atros autors explican a breca dichital tamién en función d'o que s'ha denominau «analfabetismo dichital», que consiste en a tasa habilidat u competencia d'un gran sector d'a población, especialment entre aquels naixius antes d'a decada de 1960, ta maniar as ferramientas tecnolochicas de computación y que o suyo acceso a os servicios d'Internet ye por tanto muit taso.

Aspectos prencipals

Beluns d'os primers autors que abordoron o problema d'a breca dichital dende una aproximación sistematica y socialment profunda estioron Herbert Schiller y William Wresch. De traza cheneral, istos autors planteyaban a necesidat d'incluir a toz os sectors d'a población en l'acceso a la información disponible a traviés d'as nuevas tecnolochías d'a información y a comunicación, asinas como d'as posibles avantallas derivadas de tal acceso.

Ta Pippa Norris, se tracta d'un fenomeno que implica tres aspectos prencipals: a «breca global» (que se presenta entre distintos países), a «breca social» (que ocurre en l'interior d'una nación) y a «breca democratica» (que fa referencia a la existent entre qui fa parti y qui no'n fa d'os afers publicos en linia).

Unatra corrient d'investigadors s'han centrau en aspectos cuantitativos d'a breca dichital, destacando as diferencias estatisticas en l'acceso a las tecnolochías d'a información y a comunicación, seguntes un extenso abanico de variables socio-demograficas entre as cuals destacan o sexo, edat, ran d'ingresos, escolaridad, raza, etnia y puesto de residencia.

Un d'os aspectos mas recients que han estau analisaus sobre a breca dichital, ha de veyer no solament con l'acceso a Internet, sino con a calidat de dito acceso y a disponibilidat de connexions de banda ampla que permitan accedir a contenius multimedia en tiempos y costes adecuaus a o contexto d'os usuarios.

De forma especifica, o investigador neerlandés Jan van Dijk identifica cuatro dimensions en l'acceso: a motivación ta accedir; l'acceso material; as competencias ta l'acceso; y l'acceso ta usos abanzaus (u mas sofisticaus). Planteya que a breca dichital ye en constant evolución, dau o surtimiento de nuevos usos tecnolochicos, que son apropiaus mas rapidament por aquels que tienen l'acceso en forma mas permanent y de millor calidat, determinau por dito amplo de banda.

O proposito d'a breca dichital ye enfocar-se a la revisión d'a información y comuncación ta l'extenso desembolique d'as TICs.

A breca dichital en o contexto d'a sociedat d'a información

Con ocasión d'a Cumbre Mundial sobre a Sociedat d'a Información (CMSI) os prencipals grupos d'a sociedat civil dioron vida a la campanya CRIS (Communication Rights in the Information Society –Dreitos de Comunicación en a Sociedat d'a Información), con l'obchectivo de infundir l'achenda d'a Cumbre con cuestions relacionadas con os meyos de gubierno y dreitos a la comunicación.