Bandera d'o Consello Rechional de Defensa d'Aragón

Bandera d'o Consello Rechional de Defensa d'Aragón Uso ... Proporción 2:3 Adopción 1936 — 1937 Colors    Amariello    Royo    Negro    Morato

Bandera d'o Consello Rechional de Defensa d'Aragón Reverso Uso ... Proporción 2:3 Adopción 1936 — 1937 Colors    Royo    Amariello    Morato

A bandera d'o Consello Rechional de Defensa d'Aragón estió a bandera oficial d'o Consello Rechional de Defensa d'Aragón entre os anyos 1936 y 1937.

A bandera d'o Consello d'Aragón ye rectangular. En l'anverso tien tres faixas horizontals de color negro alto, roya en o meyo y morada abaixo, representando a las colors d'as fuerzas antifaixistas presents en o consello que son respectivament a CNT, a UGT y o PCE y o Frent Popular. En l'hasta i hai un trianglo equilatero amariello con cuatre barras verticals royas representando as tradicionals colors d'Aragón. Dencima se troba o escudo d'o Consello. En o reverso se troban tres franchas con as colors d'a Republica Espanyola, royo, amariello y morau

Historia y simbolismo d'a bandera

Bandereta d'o Consello

A primera noticia d'a existencia d'ista bandera estió en o mitin que dio Joaquín Ascaso o 4 d'abril de 1937 en o cine Coliseum de Barcelona. A o día siguient ye hizada en o balcón d'a Presidencia d'o Consello y desfilan debant d'ella as fuerzas de seguridat d'o Consello. En as memorias de Joaquín se sinyala como ista bandera no yera privativa d'o Consello d'Aragón, sino que iba a estar a que substituyiría a la cuatribarrada. Tamién o propio Ascaso la describe en o diario Nuevo Aragón numero 66, de 6 d'abril de 1937, periodico que se publica en Casp entre o 20 de chinero de 1937 y o 11 d'agosto d'o mesmo anyo, "portavoz d'o Consello Rechional de Defensa d'Aragón".

A bandera reculle un gran simbolismo representando a todas as fuerzas antifaixistas: o royo y negro (CNT), o royo (UGT) y o morau (en alusión a os partius d'o Frente Popular). En cuanto a o escudo, apareixiu por primera vegada en o numero 3 d'o diario Nuevo Aragón, de 22 de chinero de 1937, se divide en 4 cuartels por una "A" d'Aragón, en os que se representan una olivera en relación con Teruel, o río Ebro de Zaragoza y os Pireneus de Uesca. A cadena rota d'o centro simboliza o nuevo y libre Aragón. Corona o escudo un sol naixient, emblema de l'Aragón que brota sobre o espaldau por os enemigos d'a libertat.

Inscripción a o marguin

A primera bandera que se conoixió d'ixe periodo estió una chicota bandereta d'auto, probablement perteneixient a l'auto d'o president d'o Consello Joaquín Ascaso. A bandereta fue trobada por o coleccionista catalán Rubén Martínez de 75 anyos de Vilassar de Dalt (Barcelona), dimpués de que presumiblement un soldau faixista la furtase en a presa de Casp como indica a inscripción manuscrita que diz "cojida en Caspe el 17-3-1938", ista mena d'inscripcions las feba o bando sublevau como botín de guerra cuan preneba bella población d'o bando republicano. A bandera se presentó en a ciudat de Casp, antiga capital d'o Consello, o día 19 de noviembre de 2011, dica alavez nomás se teneban evidencias de l'aspecto d'ista bandera por as descripcions que se feban en o boletín oficial d'o Consello d'Aragón.

Entre 2012 y 2013, apareixió en un anticuario unatra bandera, iste anticuario heba teniu a bandera en un arcón dende fa mas de 40 anyos. La crompó en os anyos 1960 a un industrial textil catalán. Pareixe estar que ista bandereta nunca no plegó a utilizar-se, ni sisquiera salió d'a fabrica, talment porque en o tiempo que transcurrió entre l'encargo y a fabricación, o Consello d'Aragón heba estau eliminau y dengún no recullió o pediu. Una d'istas banderetas estió exposada en o Palacio de Sastago en una exposición dita “Dicen que hay tierras al este”, muestra d'os vinclos economicos y culturals entre Catalunya y Aragón, que se fació o 19 d'octubre de 2017 a o 7 de chinero de 2018.

Referencias

• Datos: Q13048478