Apollo 11

De Biquipedia
Apollo 11
Aldrin Apollo 11 original.jpg
Buzz Aldrin en a superficie d'a Luna.
Datos chenerals
Operadors Flag of the United States.svg Estaus Unius
Lanzamiento 16 de chulio de 1969
Puesto Kennedy Space Center
Lanzador Saturn V
Duración d'a misión 8 días, 3 horas, 18 minutos, 35 segundos
Destín Luna
Reingreso 24 de chulio de 1969
Programa Apollo
Misión anterior Apollo 10
(1969)
Misión posterior Apollo 12
(1969)

Apollo 11 estió la cinquena misión tripulada d'o Programa Apollo d'os Estaus Unius y la primera d'a historia en aconseguir que un ser humán plegase a la Luna. A nau Apollo d'a misión se ninvió a l'espacio lo 16 de chulio de 1969, realizó lo suyo alunizache lo 20 de chulio d'ixe mesmo anyo y a l'atro'l día dos astronautas (Armstrong y Aldrin) se convirtioron en os primers en caminar sobre a superficie lunar. L'Apollo 11 estió empentau per un codete Saturn V dende la plataforma LC 39A y lanzau a las 13:32 UTC dende lo complexo d'o Kennedy Space Center, en Florida (Estaus Unius). Oficialmente se conoixió a la misión como AS-506. A misión estió un fito decisivo d'a NASA contra lo programa espacial d'a Unión Sovietica y ye considerada como un d'os intes mas significativos en a historia d'a humanidat.

A tripulación de l'Apollo 11 yera constituyida per o comandant d'a misión Neil Armstrong, de 38 anyos; Edwin E. Aldrin Jr., de 39 anyos y piloto d'o LEM, embotau Buzz; y Michael Collins, de 38 anyos y piloto d'o modulo de mando.

A denominación d'as naus, privilechio d'o comandant, estió Eagle pa lo modulo lunar y Columbia pa lo modulo de mando.

O comandant Armstrong estió lo primer ser humán que pisó la superficie d'o satelite terrestre lo 21 de chulio de 1969 a las 2:56 UTC a lo sud d'a Mar d'a Tranquilidat (Mare Tranquillitatis), seis horas y meya dimpués d'haber alunizaz. Ye alavez quan pronunció las famosas parolas: «Ye un chicot paso pa un hombre, pero un gran blinco pa la humanidat».[1] Iste fito historico se retransmitió a tota la planeta dende as instalacions de l'Observatorio Parkes (Australia).

Lo 24 de chulio, os tres astronautas aconsiguioron un perfecto amerizache en auguas de l'ocián Pacifico, rematando asinas a misión.[2]

Referencias[editar | modificar o codigo]

  1. (en) One Small Step en https://history.nasa.gov/
  2. (en) Orloff, Richard W. (2000). Apollo by the Numbers: A Statistical Reference. NASA History Series. Washington, D.C.: NASA History Division, Office of Policy and Plans. ISBN 978-0-16-050631-4.

Vinclos externos[editar | modificar o codigo]