Anarcosendicalismo
L'anarcosendicalismo ye una d'as brancas de l'anarquismo vinclata a lo movimiento obrero a traviés d'o sendicalismo. Ye un metodo d'organización y de luita d'os treballadors a traviés de sendicatos independients d'o poder politico. Ye lo resultato d'a sintesi de l'anarquismo y l'acción sendical revolucionaria. Ye diferent d'atros movimientos anarquistas en que lo suyo ambito d'actuación caracteristico (encara que no exclusivo) ye o mundo d'o treballo, complementando-se con atras organizacions d'ideyolochía parellana t'a consecución d'as fins soniatas.
Finalidat[editar | modificar o codigo]
O suyo obchectivo ye a conquiesta per parti d'os treballadors d'os meyos de producción y cambeo y a reorganización d'a sociedat seguntes os prencipios federalistas y d'a democracia dreita, autochestionando totz os tarabidatos socials y economicos per parti d'os mesmos treballadors. Ye per ixo que l'anarcosendicalismo ye radicalment diferent de qualsiquier atro modelo d'organización involuntaria u centralista, como o capitalismo y a organizazión estatalista u estatismo. A ista ideya se la conoix como autochestión.
Prenzipios y tacticas[editar | modificar o codigo]
Os suyos prencipios alazetals son: o federalismo, l'autochestión, l'acción dreita, o refirme mutuo, l'anticapitalismo y o internacionalismo.