Aleixandre lo Gran

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Aleixandre lo Gran Μέγας Αλέξανδρος
Rei de Macedonya
Rei de Macedonya
336 aC-323 aC
Predecesor	Filipo II
Succesor	Filipo III y Aleixandre IV
Rei de Persia
330-323 adC
Predecesor	Darío III
Succesor	Filipo III y Aleixandre IV
Atros títols Faraón d'Echipto 332-323 adC Predecesor Darío III Succesor Filipo III y Aleixandre IV
Naixencia	21 de chulio d'o 356 aC Pella, Reino de Macedonya
Muerte	10 de chunio d'o 323 aC Babilonia
Conchuche/s	Roxana Estateira Parisatide
Descendencia	Heracles de Macedonia Aleixandre IV de Macedonia
Dinastía	Archéada
Pai	Filipo II
Mai	Olimpia d'Epiro

Aleixandre III de Macedonya dito lo Gran u tamién a vegatas Aleixandre Magno (Μέγας Αλέξανδρος en idioma griego), naixito lo 21 de chulio d'o 356 aC y muerto lo 10 de chunio d'o 323 aC, estió rei de Macedonya (336-323 aC), conqueridor de l'Imperio Persa Aquemenida y un d'os líders militars mas importants d'o mundo antigo.

A suya persona inspiró obras literarias medievals como Historia Alexandri Magni, que fan part d'o ciclo literario dito Materia de Roma, o suyo caballo Bucefalo tamién estió prou conoixito y tamién bi ha literatura que charra sobre él.

Biografía

Aleixandre yera fillo de Filipo II de Macedonya, y en l'anyo 338 aC, encara gobernando su padre ya comandó la caballería en la batalla de Queronea, con victoria macedonya. En l'anyo 336 aC fue asasinau su padre y lo succedió. Os tracios y os griegos de Tesalia, d'Atenas y de Tebas se sublevoron, o que obligó a Aleixandre a reaccionar con una serie d'accions militars conoixidas como campanya balcanica d'Aleixandre lo Gran. Mientres yera combatindo contra os tracios en l'anyo 335 aC recibió una embaixada de celtas orientals que remató en a firma d'un tractau d'amistat. Esta embaixada ye mencionada por Flavio Arriano en a suya Anabasi. Bels historiadors suchieren que este acto diplomatico yera una evaluación d'o poder militar macedonyo. Aleixandre consiguió tornar a tener sozmesos a los griegos con un eixemplo contundent como la presa de Tebas, ciudat que quedó destruita y a on se produció una gran mortalera. Con as mugas occidentals y septentrionals aseguradas podeba encomenzar a luita contra os aquemenidas en Asia la Chica.

En l'anyo 334 aC pasó lo Helesponto, encomenzó a conquiesta sistematica d'Asia la Chica y consiguió esconfir a l'exercito de Darío en Granico en l'anyo 334 aC y Iso en l'anyo 333 aC con l'aduya d'a caballería y d'as falanches macedonyas. Fue recibito sin resistencia en Echipto y fundó la ciudat d'Aleixandría. Ya teneba dominada tota a costa d'a Mediterrania oriental, y se'n tornó enta o norte pa tener un enfrentamiento decisivo contra Darío.

Dimpués d'a Batalla de Gaugamela en l'anyo 331 aC teneba sozmesas totas as capitals de l'Imperio Aquemenida. Darío fuyió a los confins d'o reino y Aleixandre mandó encorrer-lo, y pa ixo continó a conquiesta de territorios dillá d'as mugas septentrionals de l'anterior Imperio Aquemenida ocupando tierras d'Asia Central entre os anyos 330 aC y 328 aC.

Una vegada que cumplió os suyos obchectivos en Asia Central se'n tornó y s'adrezó a la compleganza d'o río Indo, que heba estau a ventena satrapía de l'Imperio Aquemenida. A campanya encomenzó en verano de l'anyo 327 aC. Venció a los guerrers assakenoi (tribus montanyesas asvakas) y fació pactos con rei Omphi de Taxila. Esto li permitió de trescruzar lo río Indo en l'anyo 326 aC y luitar contra lo rei Poros de Punchab, que fue esconfito pero a qui dimpués li retornó o suyo reino.. Plutarco parla d'una entrevista en Punchab entre Aleixandre lo Gran y Sandrocottos u Chandragupta, un cheneral que dimpués creyaría a Dinastía Maurya. Dimpués de dominar o Punchab Aleixandre trescruzó o río Ravi pa entrar en a compleganza d'o río Gangas, pero gran part d'o suyo exercito se niega a continar y Aleixandre se vei obligau a tornar-se-ne a l'ueste aproveitando o curso d'o río Indo. Arriban en o Delta de l'Indo en l'anyo 325 aC con muitas perdugas por as malautías y os ataques d'os indios. Part d'o suyo exercito torna por mar, y atra dirichida por él mesmo se'n torna por tierras aridas en condicions duras. Encara que heba tenito exitos militars, estas campanyas resultoron un fracaso politico.

Muere en l'anyo 323 aC de paludismo en Babilonia.

Mencions en fuents aragonesas

En o Liber Regum li dicen Alexandre:

Apres la muert del rei Alexandre, regnoron sos vassallos en la tierra

En a traducción aragonesa de "Breviarium ab urbe condita" lo mencionan una vegata como Alexandre macedonyo y as atras como Alexandre el Grant:

et cayeron piedras delas nuues /. et como en aquel tiempo alexandre el grant nacio. et como fue fecha batalla contra los latinos et como fueron ue(n)cidos. et como en aquel anyo alexandre fue edificado por alexandre macedon. Dela batalla la cual los romanos fizieron co(n)tra lo samnitas

En o Libro d'el Trasoro se li nombra mas que mas Alixandre, bellas vegatas Alixandre el Grant y tamien en bel caso como Alexandre.

. e sabet q(ue) alixa(n)dre auja ya regnado .xij. anyos / e depu(e)s Reyno el .vij. anyos . ela ora el fino su vida en babilo(n)ia . e la ora era de hedat de .xxxvj. anyos / Et sabet quel rey alixandre fue fillo del rey felip de mecedonja . ya sia esto q(ue) olinpia su madre por exalçar la nat(ur)a de su fillo dixo q(ue)lo auja conçebido de vn dios q(ue) auja yazido con ella ensembla(n)ça de drago(n) e ce(r)tas el leuo asi alta vida q(ue) om(n)e puede bie(n) dezi(r) e creer q(ue) el es fillo del dios e el fue t(r)ihu(n)phado por el mu(n)do e auja por su maest(r)o a aristotil . et calixt(r)e el fue vi(r)tuoso sobr(e) todas gentes.

(...) Cambises, fillo del rey Cirus de Persia que primerament priso Egipto y lo chusmiso a su senyoria e gito fuera el rey Neptanebus, que depues fue maestro de Alixandre el grant. E la ora Perisa, entro al tiempo del rey Alixandre qui vincio a Persia. E cuando el rey Alixandre fue muerto (...)

En as actas d'o proceso de Corz de Zaragoza de 1398-1400 escriben:

assi mismo aquesta dicta narracion storial, porque segunt recita Valerio que Alexandre e Julio Cesar muyt altament remuneraron a sus servidores e sus vassallos leales

Se conservan dos manuscritos d'o "Libro d'Alexandre" en castellano, un d'os cuals tien muitos aragonesismos, y atribuito a lo riojano Gonzalo de Berceo. As fuents d'o Libro d'Alexandre son o poema francés Roman d'Alexandre y Historia de Praeliis.

Bibliografía

Fuents

• Arriano, Flavio (Madrit, 1982), Anábasis de Alejandro Magno, Editorial Gredos.
  1. Libro I-III, [1ª edición, 3ª impresión]. ISBN 84-249-0266-1.
  2. Libro IV-VIII, [1ª edición, 2ª impresión]. ISBN 84-249-0306-4.
• Curcio Rufo, Quinto (1986), Historia de Alejandro Magno, [1ª edición, 2ª impresión]. Madrit: Editorial Gredos. ISBN 84-249-1049-4.
• Diodoro Sículo & Plutarco (1986), Alejandro Magno, Edición d'Antonio Guzmán Guerra. Madrit: Akal Cambridge. ISBN 978-84-7600-108-0.
• Plutarco (2007), Vidas Paralelas: Obra Completa, Volumen VI: Alejandro & César; Agesilao & Pompeyo; Sertorio & Eúmenes, Madrit: Editorial Gredos. ISBN 978-84-249-2881-0.
• Pseudo Calístenes (1988), Vida y hazañas de Alejandro de Macedonia, Biblioteca Clásica Gredos 1. Edición de Carlos García Gual, Premio Nacional de Traducción 1978, [1ª edición, 3ª reimpresión]. Madrit: Editorial Gredos. ISBN 84-249-3481-4.

Obras modernas

• Bosworth, A. B. (2005), Alejandro Magno, Madrit: Akal Cambridge. ISBN 978-84-460-2308-1.
• Cosmelli Ibáñez, José (1983), Historia Antigua y Medieval, [37ª Edición]. Argentina: Editorial Troquel. ISBN 950-16-6348-5.
• De Santis, Marc G. (2001), At The Crossroads of Conquest, Military Heritage. Volumen 3, No. 3: 46-55, 97 (Alexander the Great, his military, his strategy at the Battle of Gaugamela and his defeat of Darius making Alexander the King of Kings).
• Guzmán Guerra, Antonio & Gómez Espelosín, Francisco Javier (2004), Alejandro Magno, Madrit: Alianza Editorial. ISBN 84-206-5865-0.
• Hammond, N. G. L. (1992), Alejandro Magno. Rey, general y estadista, Madrit: Alianza Editorial. ISBN 84-206-2723-2.
• Lane Fox, Robin (2007), Alejandro Magno. Conquistador del mundo, Traducción de Maite Solana. Colección El Acantilado 155. 960 páginas. Barcelona: El Acantilado. ISBN 978-84-96834-25-5.
• VV.AA. (1999), Nacimiento, hazañas y muerte de Alejandro de Macedonia: contenido de su vida, sus guerras, sus proezas, Introducción Carlos García Gual, traducción Carlos R. Méndez. Madrit: Editorial Gredos. ISBN 84-249-2000-7.

Vinclos externos

• Se veigan as imáchens de Commons sobre Aleixandre lo Gran.

Predecesor: Filipo II	Rei de Macedonya 336 aC-323 aC	Succesor: Filipo III y Aleixandre IV
Predecesor: Darío III	Rei de Persia 330-323 adC	Succesor: Filipo III y Aleixandre IV
Predecesor: Darío III	Faraón d'Echipto 332-323 adC	Succesor: Filipo III y Aleixandre IV

• Datos: Q8409
• Multimedia: Alexander the Great / Q8409