Accento circumflexo

De Biquipedia
Ir ta: navego, busca

L'accento circumflexo (^) ye una mena de signo diacritico. Graficament ye a unión d'un accento acuto y un accento grieu.

Os suyos emplegos prencipals, fueras d'os ampres lingüisticos, son:

  • Cambio de tono: En o griego antigo, o circumflexo marcaba una puyada y una baixada de tono en a mesma vocal (d'astí a suya forma y l'orichen d'iste signo).
  • Marca d'elisión d'un fonema: En francés, por eixemplo, marca (encara que no siempre sí o 99% d'as vegatas) que a parola antigament gosaba tener una letra que s'ha perdiu, que gosa estar una s; ye una remarca etimolochica que antigament se gosaba fer servir ta distinguir dos parolas pero que hue nomás ye qüestion d'ortografia, como en a parola hôpital, que vien d'"hospital", como s'ha conservau en atros idiomas.
  • Distinción lexica: Se puet usar ta diferenciar homonimos, como por eixemplo en gaelico escocés.
  • Quantidat: En bells idiomas se puet fer servir ta marcar que una vocal yera larga (y por un regular, tamién ubierta), como l'afrikaans.
  • Distinción de fonemas: Marca a pronunciación diferent de vocals u consonants que atrament coincidirían en a forma escrita, como pasa en esperanto.
  • Tonicidat: Se puet usar ta sinyalar a silaba tonica, como en o portugués (tot y que ye en desuso por a zaguer reforma ortografica).
  • Letra dople: En a Edat meya yera un d'os signos ta marcar a duplicación d'una letra, en chunto con atros signos. Iste emplego yera freqüent en Italia ta marcar a dople i.