A Franciada

De Biquipedia
Ir a la navegación Ir a la búsqueda
A Franciada
Información cheneral
Autor Pierre de Ronsard
Chenero literario Epopeya
Versión orichinal en Francés
Títol orichinal La Franciade
País Pavillon royal de France.svg Francia

A Franciada (La Franciade en francés) ye o títol d'un poema epico escrito por o francés Pierre de Ronsard, con o qual iste autor miró de creyar una epopeya mitolochica sobre os Valois y l'orichen d'a nación francesa, remontando-lo ta la guerra de Troya, seguindo o modelo d'a Ilíada d'Homero u a Eneida de Virchilio.

A obra estió encetada por Ronsard a petición d'o rei de Francia Carlos IX. Manimenos, ista obra, que miró d'estar d'enorme dimensión, no yera masiau adequada t'a traza d'entender a poesía que teneba Ronsard, mas adequada ta l'intimismo, por lo qual no podió concluir-la.

A obra se redactó en versos decasilabos, y o tema d'a historia ye a vida d'un personache clamau Franciano u Francus, que podría estar Astianacte, o fillo d'Hector, y que sería l'inicio d'a nación francesa. D'ista traza, igual que Eneas fuye de Troya ta fundar Roma, o fillo d'Hector, plega ta Galia, funda París en honor a o chirmán d'o suyo pai, Paris, y forma os alazetz d'a Francia moderna. Os paralelismos con a Eneida son tals que mesmo o protagonista -que en o poema se diz-se Francus- tiene una historia d'amor con una princesa cretense, igual que Eneas con a reina cartachinesa Dido.

A obra, que heba estau planificada en 24 libros, fuo un fracaso y quedó inacabada, solament con os quatro primers libros. Ronsard nunca aconsiguió o tono adequau, y en haber de respectar a desafortunada opción d'o rei d'usar versos de diez silabas en cuenta de alexandrinos, fa que no sía a l'altaria d'a resta d'a suya obra. Por atra parte, se publicó pocos días dimpués d'a matanza de Sant Bartolomé (24 d'agosto de 1572). Tot ixo trayó cierto desprestichio a Ronsard. En 1574 muere Carlos IX y le succede o suyo chirmán Henrique III, con o qual concluirá a dinastía de Valois. A moda poetica cambeó alavez, y o choven Philippe Desportes pasa a estar o nuevo poeta d'a Corte. Ronsard se retira ta o suyo priorato de Saint-Cosmes-en-l'Isles y fa una nueva edición en siet volumens d'a suya obra poetica (1578).