Puilatos

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Puilatos
Despoblau d'Aragón
Entidat  • País  • Provincia  • Comarca  • Municipio	Despoblau  Aragón  Zaragoza Comarca de Zaragoza Zuera
Partiu chudicial	Zaragoza
Población  • Total	0 hab.
Coordenadas	41°54’38’’N 0°45’ 9’’U
Puilatos Puilatos en Aragón

Puilatos yera un lugar aragonés de lo municipio de Zuera, en la comarca de Zaragoza y provincia de Zaragoza. Actualment se troba despoblau y nomás quedan que bellas ruinas a o canto de l'autovía Mudéchar.

Etimolochía

Iste toponimo proviene d'o nombre de l'amanau mont Pilatos, derivau de Pui Alto u mont Alto.

Historia

Construyiu por l'Instituto Nacional de Colonización (INC) en 1955, os primers colonos i arriboron en l'anyo 1956, rematando-se o lugar en l'anyo 1958. I heba un total de 45 viviendas en as que viviban 35 colonos con as suyas familias y bels obrers. Os colonos veniban de Zuera, fueras d'una familia provenient de Chuslivol y contaban toz éls con un lote de tierra, vivienda y dependencias anexas pa la cría d'animals domesticos

A ilesia parroquial, adedicada a Sant Chusé Treballador, se trobaba en o centro d'a localidat y a fiesta patronal se celebraba l'1 de mayo.

A historia d'o lugar duró manimenos tasament vente anyadas. O motivo ye que os terrenos trigaus pa construyir as viviendas se trobaban sobre rocas sedimentarias solubles, chesos que sufren una disolución progresiva con as corrients d'augua, creyando foraus soterranios que van creixindo a moniquet y que en zagueras afectan a la estabilidat d'a superficie d'o terreno. Os cautivos de regano no facioron so que accelerar o proceso, formando-se-ie dolinas y simas.

Con os anyos fuoron apareixindo crepazas en as parez d'os edificios que, sin afectar a la seguridat d'os suyos habitadors, yeran prou preocupants, por o que en zaguerías se decidió albandonar o lugar. Os vecins se tresladoron ta nuevas viviendas construyidas por l'Instituto Nacional de Reforma y Desarrollo Agrario (IRYDA) en Zuera y Ontinar de Salz en l'anyo 1975. Os zaguers colonos se'n fuoron en l'anyo 1981, esboldregando-se dimpués toz os edificios pa evitar o periglo de posible espaldadura.

Encara i hai una carrera en Zuera que remera o nombre d'iste lugar. En o puesto a on se i trobaba nomás quedan bellas restas d'as carreras y de l'alchub que serviba d'augua a os suyos habitadors.

Vinclos externos

• (es) Puilatos, un pueblo de colonización efímero. "El Cado de Chorche". 16 de febrero de 2021.