Ducau d'Íxar
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Ducau d'Íxar | |
|---|---|
|
| |
| Información cheneral | |
| Primer titular | Chuan Ferrández d'Íxar |
| Concesión | Ferrando II d'Aragón 16 d'abril de 1483 |
| Linache(s) | Casa d'Íxar Casa de Silva Casa d'Alba |
| Actual titular | María del Rosario Cayetana Fiz-James Stuart y Silva |
Lo Ducau d'Íxar surchió lo 16 d'abril de 1483, cuan lo rei Ferrando II d'Aragón concedió lo titol de duque a lo seteno sinyor d'Íxar, Chuan Ferrández d'Íxar y Cabrera. Encara que perteneixió a casas nobles aragonesas como los Ferrández d'Íxar u los Ximénez d'Urreya, actualment lo títol lo tien la Casa d'Alba.
Historia
En 1462 la Bailía d'Aliaga fue ocupata por lo sinyor d'Íxar Chuan Ferrández d'Íxar y Cabrera, partidario de la causa de lo prencipe de Viana. Dimpués lo sinyor d'Íxar se reconcilió con lo rei Chuan II d'Aragón y en recibió lo condau d'Aliaga y Castellot en 1464; este condau yera formato por antigas posesions de la Orden de lo Hespital: las localidaz de Castellot, las Cuevas de Canyart, Bordón, Luco de Bordón, Auguaviva, La Chinebrosa, Aliaga, Villarroya de los Pinars, Fortanet, Dos Torres de Mercader, Santoleya, Seno, Lo Mas de las Matas y la metat de Nombrevilla
Con esta donación s'entendeba que lo rei se comprometeba a obtener de la Santa Seu la suya confimación. Manimenos cuan morió Chuan II la Casa d'Íxar y los comandadors de la Orden de lo Hespital no yeran d'alcuerdo y dimpués d'un pleito luengo los lugars tornoron a ixa Orden.
Ferrando II d'Aragón compensó a la Casa d'Íxar puyando de categoría a la baronía d'Íxar, que se convertió en un ducau lo 16 d'abril de 1483. Dimpués por l'aduya de la Casa d'Íxar en l'afer de Navarra tamién puyó a ducau lo recient creyato condau d'Aliaga lo 10 d'octubre de 1487. Manimenos lo suyo hereu no teneba lo títol de duque d'Íxar (pero si que en yera de Lecera y Aliaga). En l'anyo 1528 lo rei Carlos I d'Aragón reconoixió como "grans d'Aragón" a ueito casas nobles, entre ellas los Ferrández d'Íxar como contes de Belchit, representatos por Loís Ferrández d'Íxar Arellano, segundo conte de Belchit.
La serie ducal d'Ixar se reanudó con Chuan Francisco Ferrández d'Íxar y Ferrández d'Heredia por autorización de Felipe I d'Aragón en 1599, y dende él existirá lo títol de duque d'Íxar transmeso de cheneración en cheneración. Dende que la cort se quedó fixata en Madrit en 1561 los duques d'Íxar i establioron la suya residencia pa mantener la suya posición y privilechios. Esto fació que en lo ducau quedase enfortita la posición de los suyos administradors. A la muerte d'este duque lo 13 d'abril de 1614 la suya filla donya María Estefanía Ferrández d'Íxar y Castro-Pinós recibió lo títol por herencio. Lo ducau d'Íxar lo heredó breument Donya María Estefanía (1614-1616) y dimpués donya Isabel Margalida d'Íxar Pinós (1620-1642), casata con Don Rodrigo Sarmiento de Silva Mendoza y Villadrando de la Cerda, III conte de Salinas y Ribadeo y marqués d'Alenquer.
En lo reinato de Felipe III d'Aragón lo cinqueno duque d'Íxar don Rodrigo Sarmiento de Silva, de Villandrando y de la Cerda se sublevó.
En la Guerra de Succesión Espanyola los habitadors d'Íxar prenioron partiu por los Borbons mientres que lo duque consort Fernando de Pignatelli estió austracista, y esto suposó que con la victoria de los borbons las rendas de lo ducau quedasen baixo control de la Corona dica lo 21 de mayo de 1749. Dica ixe inte lo duque d'Íxar firmaba documentos como Marqués d'Orani, un títol de Cerdenya.
Lo VIII duque d'Íxar, don Joaquín-Diego de Silva Ferrández d'Íxar y Porto-Carrero (Funes de Villalpando, 1749-1758) se casó lo 20 de marzo de 1739 con donya María Engracia Engracia Abarca de Bolea y Pons de Mendoza, Ximénez d'Urreya y Bermudez de Castro, filla de lo IX conte d'Aranda don Buenaventura de Abarca de Bolea. Lo solo fillo d'este matrimonio estió Don Pedro Pablo Alcántara Fadrique, que hederó toz los títols y estatos de los duques d'Íxar y los contes d'Aranda.
En 1798 por la muerte sin succesor de lo deceno conte d'Aranda Pedro Abarca de Boleya lo títol de conte Aranda pasó a lo IX duque d'Íxar, Pedro Pablo de Alcántara de Silva Fernández de Híjar.
A zaguers de lo sieglo XIX, con la muerte d'Agustín Fernández de Híjar, catorceno duque d'Íxar, lo hereu de lo títol estió lo suyo primo Alfonso de Silva y Campbell. Con esto lo títol de duque d'Íxar s'adhibió a la lista de títols que poseye la Casa d'Alba, (la lista mes gran de títols d'alcuerdo con lo Libro Guiness).
Lista de duques d'Íxar
Bibliografía
- (es) Demelsa Ortiz Cruz: El señorío, luego ducado de Híjar. Cuadernos del Ducado de Híjar 1: El Legado cultural. 2008. Archivo Ducal de Híjar.
Vinclos externos
- (es) Duques de Híjar, en a web Grandes de España.