Trisquel

De Biquipedia
Ir ta: navego, busca
Trisquel formato por tres garras en a bandera d'a Isla de Man.
Eixemplo de trisquel

O Trisquel u Triskelion ye un simbolo solar que consiste en tres figuras espirals que salen d'un punto fendo anglos de 120º entre ellas en simetría rotacional.

A sobén o simbolo se veye como tres gambas un poquet doblatas en os chinollos: os simbolos d'a isla de Man y de Secilia. De feito o nombre triskelion significa en idioma griego tres gambas.

S'emplega muito en os paises celtas, en especial en Irlanda, pero no ye exclusivo d'estos países ni totas as referencias más antigas provienen d'o mundo celta. Lo trobamos ya en os gravatos megaliticos de New Grange (Irlanda), anteriors a os celtas; pero tamién bi'n ha representacions antigas fuera d'Irlanda, como en os baxiellos minoicos de Creta, monedas de Licia, monedas d'a colonia griega de Siracusa en Secilia, y atras representacions antigas en las rechions anatolicas de Pamfilia y Pisidia. En a Peninsula Iberica ya trobamos o simbolo en culturas antigas, como a cultura castrexa de Galicia y a cultura celtiberica.

Usos más modernos en trobamos fueras d'o mundo celta en muitas y variatas zonas, como en l'arte chaponés y en reportals pirenaicos, como en Casa Félix de Sallent de Galligo.

Sobre o significato d'o simbolo bi ha muitas interpretacions; se creye que como as esvasticas, lauburus y feguras d'o mesmo tipo, ye un simbolo solar. Tamién podemos pensar que si o trisquel s'emplega muito en os países celtas ye porque o numero tres tenerba un significato especial en a filosofía, cosmolochía y teolochía paganas.