Transistor
De Biquipedia
O transistor ye un dispositibo semicondutor d'estato solido que s'emplega ta l'amplificazión e a conmutazión, e tien tres terminals: una chicota corrient u boltache aplicato á un d'os terminals controla la corrient en os atros dos. O transistor ye o component prenzipal de tota la eletronica moderna
En os zercuitos dichitals, o transistor s'emplega como un interruptor eletrico muit rapedo, e a organizazión sistematica d'os transistors premite que funzionen como puertas lochicas, memorias tipo RAM e microprozesadors.
En os zercuitos analochicos os transistors s'usan como amplificadors. Os amplificadors d'audio, as fuents d'alimentazión estabilizatas e os amplificadors de frecuenzia son zircuitos analochicos que leban transistors.
Contenius |
[editar] Imbenzión
O transistor s'imbentó en os Laboratorios Bell en abiento de 1947 (amostrato por primera begata o 23 d'abiento) por John Bardeen, Walter Houser Brattain e William Bradford Shockley, á qui lis dioron o premio Nobel de Fesica en 1956. Ironicament, s'eban proposato creyar un transistor d'efeuto campo (FET) predito por Julius Edgar Lilienfeld ya en 1925 pero á la fin descubrioron l'amplificazión de corrient en o transistor con puntos d'unión que dimpués eboluzionó dica combertir-se en o transistor bipolar (BJT).
[editar] Tipos
En termins chenerals, os transistors discretos se clasifican seguntes os siguients parametros: tipo (transistor, FET), potenzia (baxa, meyana, alta), frecuenzia (baxa, meyana, alta) e funzión (amplificazión, conmutazión). D'ista manera, por exemplo, un transistor en concreto puet estar clasificato como bipolar, de baxa potenzia e alta frecuenzia de conmutazión.
Os transistors bienen en una ampla gama de encapsulatos, á ormino de bidre, metal, zeramica u plastico. Os transistors de potenzia tienen un encapsulato relatibament gran que puet estar montato sobre un disipador de calor ta ebitar que se cremen. En o estremo oposato, bels transistors d'alta frecuenzia e de montache superfizial son tan chicots como una particla de polbo. Bi ha muitos transistors, espezialment os de potenzia que tienen un terminal (á sobent o coleutor u o drenador) coneutato internament con o encapsulato ta fazilitar a disipazión d'a calor.
Os primers transistors yeran feitos de chermanio (Ge) pero agora la mayoria son feitos de silizio (Si). Bels d'os de mayor rendimiento se fabrican con arseniuro de galio (GaAs).
[editar] Cómo funzionan os transistors?
Bi ha dos tipos basicos de transistors, os bipolars (BJT) e os d'efeuto campo (FET), e cadagún funziona de forma diferent. O transistor bipolar se diz asinas porque a canal de conduzión prenzipal usa tanto eletrons como bueitos ta tresportar a corrient eletrica prenzipal. Os d'efeuto campo (tamién ditos unipolars) nomás emplegan un d'os dos tipos de tresportador (u bueitos, u eletrons, seguntes o soztipo de FET). Se beigan os articlos de cada tipo de dispositibo ta más informazión.
[editar] Zonas de treballo
Zona de tallo: O feito de fer nula la corrient de base, ye equibalent á mantener o zercuito base emisor ubierto, en istas zircunstanzies a corrient de coleutor ye cuasi nula e por ixo se puet considerar o transistor en o suyo zercuito como un interruptor ubierto.
Zona de saturazión : O diodo coleutor ye polarizato dreitament e o transistor se comporta como una chicota resistenzia. En ista zona un aumento d'a corrient de base no preboca un aumento d'a corrient de coleutor, ista pende nomás d'a tensión entre emisor e coleutor. O transistor se parixe en o suyo zercuito emisor-coleutor á un interruptor zarrato.
Zona autiba dreita: Corresponde á una polarizazión dreita d'a unión emisor-base e á una polarizazión imbersa d'a unión coleutor-base. Ista ye a rechión d'operazión normal d'o transistor ta l'amplificazión.
[editar] Sensibilidat á la luz
Os transistors bipolars pueden autibar-se con luz á más de con eletrezidat. Os dispositibos diseñatos ta iste proposito se dizen fototransistors, pero no son más que transistors estandars con un encapsulato transparent.
Se beigan as imachens de Commons sobre transistors.
