RAM

De Biquipedia

A memoria RAM, de l'anglés Random Access Memory (en aragonés Memoria d'Azeso Aleatorio), ye una mena de memoria informatica, carauterizata por un azeso dreito en cualsiquier orden (aleatorio) en un tiempo constante, sin de distinzión d'a posizión á on que se trobe a informazión ni d'a posizión de l'anterior leutura. Güé en día se produzen por meyo de zercuitos integratos. O termín memoria RAM se emplega á sobent ta referir-se á los modulos de memoria.

Iste feito contrasta con atros mecanismos d'almadazenamiento, como as zintas u os discos magneticos e opticos, en que o dato otenito pende d'a posizión d'o capezal mobil de leutura. En istos dispositibos, o mobimiento tardia más que a mesma transferenzia de datos, e o tiempo d'azeso pende d'a posizión fesica d'o siguient elemento.

A palabra RAM s'asozia con tipos de memoria bolatils (com os modulos de memoria DRAM), á on que a informazión se pierde cuan l'alimentazión s'apaga. S'ha de saber que atros tipos de memoria tamién son RAM (d'azeso aleatorio), como a memoria ROM e un tipo de memoria flash dita NOR-Flash,

Güé en día s'emplega como memoria prenzipal en toz os ordinadors personals, por ixo tamién se conoxe á sobent como memoria prenzipal u esterna.

En cheneral, as RAM se dibiden en estaticas e dinamicas. Una memoria RAM estatica mantiene o suyo contenito inalterato mientres contine estando alimentata eletricament. D'atra man en una memoria RAM dinamica a leutura ye destrutiba, ye dezir, que a informazión contenita en as suyas zelulas se pierde en leyer-la.