Republica de Chenova
| Serenissima Repubblica di Genova ''Serenisma Republica de Chenova'' |
||||
|---|---|---|---|---|
|
||||
|
||||
 |
||||
| Capital | Chenova | |||
| Idioma oficial | Ligur, latín y italiano | |||
| Relichión | Catolica | |||
| Gubierno | Republica | |||
| • Establita | 1005 | |||
| • Desaparición | 1797 | |||
A Republica de Chenova estió una d'as republicas maritimas italianas més importants.
Chenova prenió importancia a fins d'o sieglo XI, entrando en competencia con Venecia.
En o sieglo XII Chenova sozmete tota a costa de Liguria, territorio que controlará dica o sieglo XVIII. En 1131 o Papato repartió Corcega entre Pisa y Chenova. A fins d'o sieglo XII os chenoveses teneban o control d'os chudicato sardos de Gallura, Cáller y Torres.
Os chenoveses son forachitatos d'o Imperio Bizantín en a Quatrena cruzata. Manimenos os chenoveses aduyoron a los griegos contra os franceses y venecians y quan os paleologos griegos restauran o Imperio Bizantín recuperando o control de Costantinoble en 1261. En conseqüencia conceden a los chenoveses o monopolio comercial d'a Mar Negra. Chenova tenió colonias en a peninsula de Crimea y Mar d'Azov conoixitas como Gazera.
Por ixos tiempos os chenoveses creyan una ruta comercial maritima atlantica, dica Bruxas. En 1284 os chenoveses vencioron a los pisans en a batalla de Meloria (en a mar de Livorno).
En 1349 os chenoveses destruyoron a zaguera flota que ha tenito o Imperio Bizantín en represalia por querer evitar a suya preponderancia y mirar l'aduya veneciana y catalana. Dimpués de destruyir a flota bizantina os chenoveses prohibioron o trafico bizantín por a Mar Negra.
En a guerra de Chioggia (1378-1381) Chenova derrota a la Republica de Venecia, pero ixo fa que Chenova s'endeude. A principios d'o sieglo XV os acreyedors d'a republica fundan o Banco de Sant Chorche pa chestionar os ingresos que lis conceden en contrapartita. En 1453, quan os otomans prenen Costantinoble, os chenoveses pierden o control d'o comercio en a Mar Negra. A deuda publica ye tan gran que o banco plega a controlar o Estato. Chenova pierde l'autonomía politica, y reorienta a suya economía enta actividatz financieras.
En 1528 Andrea Doria fa que Chenova s'alineye con Carlos V. A fins d'o sieglo XVI Chenova esdevién a primera potencia financiera d'Europa.
En o Tractato de Versailles de 1768 Chenova ha de ceder a Francia os suyos dreitos sobre Corcega.
En o periodo napolionico, mientres as guerras napolionicas, Chenova fació parte d'a Republica Ligur, que fue ocupata en 1805 por Francia. O Congreso de Viena de 1814-1815 no reestablió a republica de Chenova, que ye adhibita a lo Reino de Cerdenya, con Savoya y Niza.
