Participio fuerte en l'aragonés
O participio fuerte en aragonés se remonta a participios latins con una terminación en -SU, dezaga de vocal u de consonant. Son participios irregulars que tienen l'acentuación en a radiz en cuenta de tener-la en o morfema de participio. Bi n'ha en totas as parlas aragonesas pero historicament bi ha una tendencia a desapareixer por sustitución por o participio regular. On millor se conservan ye en aragonés centro-oriental.
Derivan d'un participio latín en -SU dezaga de vocal u d'un participio latín rematato en -TU dezaga consonant
Contenius |
[editar] Rematatos en -so
Derivan d'un participio latín en -SU dezaga de vocal. En as parlas altoaragonesas actuals se documenta meso, malmeso y preso. En aragonés meyeval se documenta admeso, confeso y excluso. En verbos propios d'o rechistro culto u tecnico como emitir se puet fer servir o participio fuerte (emeso).
[editar] Rematatos en -ito
Derivan d'un participio latín rematato en -CTU y son feito, dito, cueto, escueto, recueto y frito. En aragonés meyeval ye bien documentato esléito. Muitos d'estos participios son escritos s'escribiban en a ortografía meyeval con -y- en cuenta de -i-, indicando que no ye a vocal acentuata: feyto, sleyto, cueyto, ecetra.
En aragonés meyeval os verbos irregulars rematatos en -uir, cultismos u semicultismos derivatos de verbos latins rematatos en -UERE podeban tener participios fuertes (destrúito, estrúito), relacionatos con participios en latín tipo DESTRUCTU.
Os verbos irregulars rematatos en -ducir, derivatos d'o latín DUCERE (verbo que tien como participio DUCTU) pueden tener en aragonés un participio fuerto en -ito, como ye o caso de adueito en aragonés meyeval.
Os verbos irregulars rematatos en -enyer u -enyir teneban tamién participios fuertes, (constreyto), que derivaban de participios en latín rematatos en -ICTU-M, (CONSTRICTUM).
[editar] Rematatos en -(p)to
Derivan d'un participio latín rematato en -PTU y son roto y escrito (en o luengache meyeval se puet escribir scripto).
[editar] Rematatos en -rto
Derivan d'un participio latín rematato en -RTU y son farto, muerto, tuerto, ubierto, despierto, durmierto, sufierto y sirvierto. En aragonés meyeval tenemos tamién inserto.
[editar] Rematatos en -lto
Derivan d'un participio latín rematato en -LTU y en as parlas altoaragonesas actuals en tenemos como eixemplo suelto. En aragonés meyeval tenemos absuelto y falta.
[editar] Rematatos en -sto
Derivan d'un participio latín rematato en -STU y en as parlas altoaragonesas actuals en tenemos como eixemplo puesto, quiesto, visto y respuesto.
[editar] Participios de verbos irregulars con epentesi antihiatica y afins
Os verbos irregulars con epentesi antihiatica y os verbos irregulars rematatos en -yir pueden presentar participios irregulars fuertes: cáito, tráito, fúito, múito, en aragonés centro-oriental. Ye notable que os dos primers se troben en aragonés chistabín, parla aragonesa oriental on actualment se fa servir o participio en -ido u -iu. Bells autors se planteyan que bi haiga habito una translación acentual dende os participios regulars caíto, traíto, fuíto y muíto.
En aragonés meyeval os verbos irregulars rematatos en -uir, cultismos u semicultismos derivatos de verbos latins rematatos en -UERE podeban tener participios fuertes (destrúito, estrúito).
[editar] Atros
Provinient d'atro orichen ye o caso de seco.
[editar] Bibliografía
- Chabier Lozano Sierra y Ánchel Loís Saludas Bernad, Aspectos morfosintácticos del belsetán (aragonés del valle de Bielsa), Zaragoza, Gara d'Edizions-CEDESOR-Concello de Bielsa-Institución "Fernando el Católico". 2005.
- Javier Terrado Pablo La Lengua de Teruel a fines de la Edad Media. Instituto de Estudios Turolenses, 1991.
