Mar Royo

De Biquipedia

O Mar Royo u Mar Roya (en arabe Bahr el-Ahmar) ye un golfo de l'Ozián Indico situato entre Africa y Asia. Á lo sur, o Mar Royo se chunta con l'Ozián Indico por o estreito de Bab el-Mandeb y o golfo d'Adén. Á lo norte se troba a peninsula d'o Sinaí, o golfo d'Acaba y o canal de Suez (que premite a comunicazión con o Mar Mediterranio). O Mar Royo tien poco más de 1900 km de largaria, por un amplo masimo de 300 km y una fondura masima de 2500 m, con una fondura meyana de 500 m. A superfizie d'o Mar Royo ye de bels 450.000 km². Ye poblato por más de 1.000 espezies de inbertebratos, 200 espezies de corals y 300 espezies de tiburons.

As temperaturas d'a superfizie son relatibamén estables, entre 21 y 25°C. A bisibilidat ye prou buena dica os 200 m de fundo pero se pueden debantar ascape aireras fuertes y as corriens se tornan riesgosas.

A creyazión d'o Mar Royo se debe á la deseparazión d'Africa y a Peninsula Arabiga (Asia). O mobimiento prenzipió fa bels trenta millons d'años y contina güe, o que esplica a esistenzia d'una autibidat bolcanica n'as partis más fundas d'iste mar.

Os países situatos á cantos d'o Mar Royo son Echipto, Sudán, Eritrea e Chibuti en o beral africano e Israel, Chordania, Arabia Saudí y Yemen en o beral asiatico.

Bellas ziudaz en costa d'o mar Royo son: Assab, Port Sudan, Port Safaga, Hurghada, Suéz, Sharm el-Sheikh, Eilat, Acaba, Dahad, Jedda y Al-Hudaidah.