Jesús Moncada

De Biquipedia
Ir ta: navego, busca
Jesús Moncada
Información personal
Calendata de naixencia: 1 d'aviento de 1941
Puesto de naixencia: Flag of Aragon.svg Mequinenza (Cinca Baixa, Aragón)
Calendata de muerte: 13 de chunio de 2005
Puesto de muerte: Flag of Catalonia.svg Barcelona (Barcelonés, Catalunya)
Ocupación: Escritor y traductor

Jesús Moncada Estruga (Mequinenza, 1941 - Barcelona, 2005) estió un escritor y traductor aragonés en luenga catalana.

Biografía[editar | editar código]

Moncada naixió en Mequinenza, lugar de parla catalana d'a comarca d'a Cinca Baixa, en Zaragoza, un 1 d'aviento de 1941. Ixe paisache estariba con os anyos o scenario a on que iban a trascorrer as suyas obras, ricas en lexico local.

Considerato un d'os autors més importants d'a literatura contemporania en catalán, a obra de Moncada ye estata reconoixita per a critica y ganadera de diversos premios y destincions. Ye igualment un d'os autors d'a literatura en catalán més tradueitos. Una d'as suyas obras prencipals, Camí de sirga ("Camín de sirga"), ye tradueita ta més de quinze idiomas, d'entre élls l'aragonés.

En a suya faceta de traductor, Moncada abocó enta o catalán muitas obras d'a literatura francesa, d'autors tan diversos como Jules Verne, Alexandre Dumas, Guillaume Apollinaire u Boris Vian. Emplegó pseudonimos ta muitas d'as suyas traduccions.

Poco antis d'a suya muerte, Moncada recebiba o Premio d'as Letras Aragonesas 2004 en Teruel. O churato l'heba trigato perque tota la suya obra literaria succede en Aragón, os suyos personaches, os suyos paisaches, y tamién o suyo mundo imachinario mantién o reflexo fidel d'a suya tierra d'orichen. Mesmo fendo uso d'una luenga minoritaria, ha conseguito que as suyas obras sigan tradueitas ta infinidat d'idiomas y son conoixitas en o mundo entero".

O 13 de chunio de 2005 moriba d'un cáncer. O 9 de chulio li atorgoron postumament a destinción de fillo predilecto de Mequinenza, y se'n aventoron as cenisas en o terreno familiar d'o lugar antigo, cara ta o entibo de Ribarroya, o suyo paisache natal y literario.

Obra[editar | editar código]

Novelas[editar | editar código]

  • Camí de sirga "Camín de sirga" (1988)
  • La galeria de les estàtues "A galería d'as estatuas" (1992)
  • Estremida memòria "Esterizata memoria" (1997)

Relatos curtos[editar | editar código]

  • Històries de la mà esquerra i altres narracions "Historias d'a man cucha y altras narracions" (1981)
  • El cafè de la granota "O café d'a rana" (1985)
  • Calaveres atònites "Calaveras esturditas" (1999)
  • Contes "Cuentos" (replega d'os suyos tres primers libros de relatos) (2001)
  • Cabòries estivals i altres proses volanderes "Barucas estivals y altras prosas volanderas" (2003)

Premios y honors[editar | editar código]

  • 1971 Premio Joan Santamaria (Per Històries de la mà esquerra i altres narracions)
  • 1988 Premio Joan Crexells (Per Camí de sirga)
  • 1988 Premio Nacional de la Crítica - narrativa catalana (Per Camí de sirga)
  • 1989 Premio de la Fundació d'Amics de les Arts i les Lletres de Sabadell (Per Camí de sirga)
  • 1989 Premio Ciutat de Barcelona (Per Camí de sirga)
  • 1989 Premio de la Crítica Serra d'Or de novel·la (Per Camí de sirga)
  • 1997 Premio Joan Crexells (Per Estremida memòria)
  • 1998 Premio de la Crítica Serra d'Or de novel·la (Per Estremida memòria)
  • 2001 Premio dels Escriptors Catalans de l'AELC (Per a calidat d'o conchunto d'a suya obra)
  • 2001 Creu de Sant Jordi (Cruz de Sant Chorche, maxima destinción atorgata per a Cheneralidat de Catalunya a personas destacatas en a difusión y promoción d'a luenga y cultura catalanas)
  • 2005 Premio de las Letras Aragonesas 2004

Vinclos externos[editar | editar código]