Caelifera

De Biquipedia
Ir ta: navego, busca
Caelifera
Salton Gundian Galicia 2.jpg
Langosto europeu d'alas royas (Calliptamus barbarus)
Denominacions populars
Langostos, pantinganas, pintinganas, grillas, grichas, grillos, grillons, grichons
Rechistro fosil
Dende o Triasico
Clasificación scientifica
Dominio:
Eukaryota
Reino:
Animalia
Filo:
Arthropoda
Clase:
Insecta
Orden:
Orthoptera
Suborden:
Caelifera
Descripción
Caelifera
LATREILLE, 1793

Os celifers u celiferos (pronunciau /θeli'fes/~/θeli'feɾos/, como "zelifés" u "zeliféros" respectivament; scientificament Caelifera -en latín-) son una suborden d'insectos ortopteros mayoritariament herbivoros, emerchius como grupo evolutivo en o periodo Triasico (anque bells autors es consideran mas antigos, de o periodo Permiano), con una gran diversidat de cheneros y especies actuals.

Tienen as patas zagueras adaptadas ta brincar, dos pars d'alas mimbranosas d'entre as quals as dos primeras son tiercas y protectoras (anque no se consideran verdaders elitros como es de belatros grupos d'insectos) y as zagueras les sirven ta o volido. As antenas son curtas, formadas por menos de 30 segmentos u artiellos.

Descripción[editar | editar código]

Os celiferos tienen bells rasgos comuns que os fan distinchir de belatros grupos emparentaus, especialment a suborden Ensifera (os ensiferos), l'atro gran camal d'os ortopteros, con a que a sobén se os entivoca.

Os dos rasgos mas diferencials son as antenas y os organos auditivos: os celiferos tienen totz antenas relativament curtas, con menos de 30 artiellos (segmentos), y as mantienen rectas, mientres que bellas especies d'ensiferos (como a conoixida pantingana verde Tettigonia viridissima) tienen as antenas muit largas y as fan servir ta guidar-se en os suyos desplazamientos. Os organs auditivos son externos, como en totz os insectos, y anque no i son en todas as especies de celiferos, as que en tienen es tienen en l'abdomen, mientres que os ensiferos es tienen en as patas.

Tampoco no bi ha garra especie descrita de celifero a on que as fembras tiengan un ovopositor, unatra caracteristica común en as fembras d'os ensiferos.

Os celiferos tienen alas, que en bellas especies pueden estar vestichials y redueitas en totz os adultos u estar-ne solo que en un d'os sexos (freqüentment, en as fembras). Como insectos hemimetabolos, os exemplars chuvenils no tienen as alas d'os adultos dica que arriban a la madureza sexual. As alas externas, o primer par, son tiercas y no sirven ta volar. en muitas especies tienen coloración mimetica. O segundo par d'alas, mas tovas y flexibles, son extensibles y permiten o volido. En bellas pocas especies, iste segundo par d'alas de volar tiene una color bien viva, que le gosa servir a l'individuo ta mostrar una marca muit envistable a os potencials depredadors que l'encorran, tot fendo-les centrar l'atención en ella, y que le permite d'escapar quan o celifero tanca las alas y simplament se deixa cayer ta tierra y torna a adoptar l'apariencia mimetica habitual, causando que o depredador, en os millors casos, pierda de vista a imáchen que perseguiba y no saba tornar a trobar-lo.

No totz os celiferos son voladors. A mayoría d'especies no vuelan si que distancias curtas, de bells pocos metros, y con un gran coste d'enerchía. Manimenos, qualques especies son conoixidas por gosar volar kilometros, especialment quan s'agrupan en formando grans ixambres de milenta u dica millons d'individuos: iste fenomén ye muit especifico de qualques especies (muit pocas) y por os efectos que tiene, en acotolando toda a vechetación incluindo l'agricola, se conoix como «plagas de langostos».

Nombres populars[editar | editar código]

No existe en aragonés garra nombre popular que identifique inequivocament a os celiferos. As denominacions que se les gosa aplicar describen, mas que mas, un estereotipo morfolochico d'insecto que puede no coincidir, necesariament, con o grupo zoolochico que se conoix como celiferos.

Manimenos, d'entre as diferents denominacions, a que con mas freqüencia s'aplica univocament ta nombrar a qualques especies de Caelifera ye «langostos», que designa especialment a las especies de mida menor a bells 6 u 7 cm. S'ha de remarcar que ni totz os insectos que popularment se conoix como langostos son celiferos, ni totz os celiferos se dicen langostos, pus como s'ha dito o criterio popular ye discriminar as especies por a mida (se podría dicir que as especies chicorronas son «langostos», as mas grans son «pantinganas») y mesmo especies miembros d'iste grupo zoolochico que habitan en as nuestras latituz y que son especialment granizas (como Anacridum aegyptium) reciben a denominación popular de «pantinganas»[1] en estando celiferos.

Imáchens[editar | editar código]

Referencias[editar | editar código]

  1. (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7

Vinclos externos[editar | editar código]