Anabatismo
De Biquipedia
Los anabatistas son una denominazión cristiana protestant que amanixió en lo sieglo XVI mientres lo mobimiento de la Reforma Protestant. Los anabatistas compartiban la dotrina basica de lo protestantismo, pero se diferenziaban sobre tot en la dotrina de lo batismo. Los anabatistas creyeban que lo batismo no més se podeba fer en creyents adultos que ya teneban la capazidat d'entender lo sennificato suyo como representazión de la muerte en lo pecato e la bida en Cristo. Por ixo consideroron que lo batismo infantil no teneba balidez (lo nino no teneba la conoxenzia de l'acto de lo batismo ni eba preso la dezisión de creyer en lo sacrifizio de Cristo), e por ixo caleba que se batizasen atra begata.
Lo nombre anabatista probién de lo griego anabaptizo, que en idioma aragonés quier dizir "atro batismo dimpués". Pero este termin ye confuso porque suposaba la creyenzia en un doble batismo. En reyalidat pa lo anabatistas i eba un unico batismo, lo batismo adulto, e no baltizaban á los ninos de los creyents que cuan ya yeran adultos.
S'ha d'aclarir que la dotrina de lo batismo adulto ha estato comuna e cutiana en la istoria de lo cristianismo, enantes e dimpués de la Reforma Protestant, e muitas denominazions protestants prautican lo batismo adulto. Lo que fa singular á los anabatistas ye que estioron la primera familia protestant que proposó esta dotrina dimpués de la echemonía dotrinal catolica de lo batismo infantil.
