Variola virus

De Biquipedia
Ir a la navegación Ir a la búsqueda
Variola virus
Virus d'a picueta
Smallpox en micrografía electronica.
Clasificación scientifica
Grupo: I (dsDNA virus)
Familia: Poxviridae
Chenero: Orthopoxvirus
Especie: Variola virus

O Variola virus (en latín, «vereno d'a picueta») ye una especie de virus d'o chenero Orthopoxvirus, en a familia d'os Pox virus (virus d'a picueta y relativos) en a que bells autors lo subclasifican adintro d'una presunta subfamilia que en dicen Chordopoxvirinae. Causa patochenicidat unicament, que se'n sepa, en o ser humán, on que la infección, cas que i prospere, desarrolla la picueta.

Variola virus ye un virus con envuelta membranosa (construita a partir d'a membrana de l'apariello de Golgi d'as celulas d'o huespet) que deixa adintro una capside virica de simetria helicoidal, con unas dimensions aproximatas, en chunto, de 302 dica 350 nanometros de lonchitut, per bells 250 - 270 nm d'amplura. O chenoma consiste d'un fragmento només (bi ha virus DNA que lo lievan fragmentato, p. ex. lo virus d'a gripe), de dople catiena de DNA, con forquetas d'apariellamiento de bases en os estremos d'a suya seqüen¨cia, con una lonchitut aproximata de 186 kilopars de bases (ixo ye, una particla virica muit gran). O virión u particla virica sin de cubierta membranosa (per eixemplo, extraito per lisi celular in vitro d'una celula infectata, u bien, lavata con deterchents especificos) mantién a suya infectividat, a la contra que muitas altras especies viricas con envuelta lipidica.

A especie virica més emparentata ye lo Molluscum contagiosum virus (chénero Molluscopoxvirus), causant d'un tipo de verrugas epidermicas (lo Molluscum contagiosum) inoquas de tot.

Circlo replicativo[editar | editar código]

O circlo replicativo de Variola virus ye bien enreligato, doncas incluye tamién diversas formas infectivas, que tienen mecanismos diferents ta dentrar en a celula. A primera fase replicativa se produce en a mucosa d'a farinche d'a presona, adubindo-se la primera viremia (viremia primaria) d'entre 17 y 21 días dempués d'o contachio. Dimpués d'ixo, amaneixen picuetas en a luenga y quan istas s'ubren, se fa cheneral l'aparición d'o rash maculopapular en tot o cuerpo, dintro d'un plazo de 4 días dende la primera afección d'a farinche. Como la més gran parte d'as infeccions viricas, la primera viremia no produce garra sintoma carateristico, si que fa frebera, mal de capeza, y os tepicos sintomas asociatos con as infeccions viricas en cheneral (ixo ye perque la respuesta inmune antiviral sigue quasi siempre las mesmas vías).

As pustulas e las suyas restas (s'ixucan e cayen como costas) son o material més contachioso. En a fase de rash, a capacidat de contachio no s'estingue dica que lo huespet pierde la zaguera crosta de pustula, en un tiempo que puet estar dica d'un mes dempués d'os primers sintomas. O contenito en particlas viricas d'as ditas crostas ye inmenso, y ixo fa que tamién a ropa de vestuache y d'o leito sigan contachiosas.

Se veiga tamién[editar | editar código]

Vinclos externos[editar | editar código]