Vaixiello

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Vaixiellos en a batalla de Trafalgar en un quadro de Louis-Philippe Crépin.

USS Iowa (BB-61) en practicas de tiro en Vieques Island, Puerto Rico, en 1984.

Un vaixiello (d'o catalán vaixell y iste, d'o latín vascellum, deminitivo de vas, recipient) ye un tipo de barco que ye concebito especificament ta o suyo emplego en a guerra; por ixo tienen caracteristicas diferents a las d'atros tipos de barcos. Son barcos que poseyen armas, ta la suya esfensa u ta atacar a os suyos enemigos, y a ormino o suyo disenyo lis permite de recibir danyos que serían difícils de reparar en os barcos d'uso civil.

Os vaixiellos fan parte de l'Armata d'o suyo país, encara que d'antis más tamién os particulars (individual u colectivament, agrupatos en companyías mercantils) podeban armar vaixiellos ta prener parte en as operacions belicas en a mar: yeran os clamatos corsarios, que teneban una carta (clamata patent de corso) d'o suyo Gubierno u monarca ta esferenciar-los d'os simples piratas, no cubiertos por o suyo país.

Sindembargo, en as guerras a esferencia entre un barco mercant y un vaixiello no ye fácil: muitos barcos civils reciben armamento ta esfender-se d'os ataques (asinas, en a Primera y Segunda Guerra Mundial os barcos d'os Aliatos fuoron artillatos. Dica o sieglo XVII, a mayor parte d'os barcos d'as Armatas yeran barcos civils con armamento ocasional; antiparte, bellos barcos mercants teneban canyons ta la suya protección contra a piratería u os corsarios.