Servilla

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Birolla sobre una servilla

Una servilla u serviella ye una plataforma baixa disenyada pa transportar cosas, mas que mas, bebidas y servicios d'alimentación. A superficie d'as servilla ye lisa, pero con os cantos debantaus en tot o suyo perimetro pa privar que os obchectos s'esbaren y se caigan d'istas. Se disenyan en una gran variedat de formas, encara que as más habituals son as rectangulars u as ovaladas. A vegadas, incorporan ansas destacadas u retalladas en os cantos pa manullar-las con más comodidat.

A servilla puet fabricar-se con diferents materials, incluyindo archent, latón, fierro, fusta y papel maixé. Bells modelos tienen patas curtes u plegables pa posar-las en una posición elevada.

A servilla ye una aina caracteristica d'o sector d'a hostelería, tanto d'una tabierna u cafetería como d'un restaurant. En iste caso, s'utiliza más que más pa o servicio de banquets porque en caso contrario, lo más normal ye servir os platos individualment.

A forma de manullar a servilla consiste en transportar-la con una d'as dos mans servindo os alimentos y bebidas con l'atra mientres se mantiene en equilibrio. Pa evitar que caiga mientres a operación, ye important seguir bellas normas basicas:

Meter en o centro os materials más pesaus u zaguers en retirar (en o caso de bebidas, por eixemplo, as botellas).
Prencipiar servindo os productos situaus en os laterals y rematar por os d'o centro.

Tamién s'usan pa servir canapés y aperitivos estando os comensals dreitos, ofrindo-los a os convidaus u metendo-los sobre as mesas.

Variedatz[editar | modificar o codigo]

Servilla de mayordomo

A servilla de leito tien a sobén un canto lateral más alto, ansas a os costaus estreitos pa facilitar o suyo transporte (por un regular retalladas a os cantos) y patas plegables pa refirmar-la. Se fa servir pa desayunar u cenar posau en o leito (u en un atro mueble parellano como una cadiera u sofá) prescindindo, por tanto, d'a mesa.
A servilla de mayordomo tamién tien un canto más alto, ansas en os laterals y patas plegables que se doblan. S'utiliza pa o servicio de bebidas y sirve por un regular como mesa auxiliar.
As servillas clinicas s'utilizan pa transportar instrumentos quirurchicos. Son rectangulars y son fabricadas d'acero inoxidable pa resistir a calor d'a esterilización y no sofrir corrosión.
En horticultura, as servillas de simients s'utilizan pa fer creixer plantas y flors a partir d'as suyas simients.^[1] Tamién se fan servir pa prener implants de plantas. As servillas d'iste tipo se fabrican en poliestireno u polietileno. Se distribuyen en muitas midas; as más habituals son a danesa y a europea.