Rechions culturals de Letonia

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Rechions culturals de Letonia con as ciudatz y lugars

As rechions culturals de Letonia comprenden diversas arias de Letonia formalment reconoixidas como diferents d'a resta d'o país. Encara que belunas d'istas rechions son vistas simplament como culturalment diferents, atras han estau historicament partis de diferents países y s'han utilizau ta dividir o país ta fins administrativos, entre atros. A Constitución de Letonia reconeixe quatre rechions diferents: Curlandia, Zemgalia, Letgalia y Livonia.

Rechions

• Curlandia (en letón Kurzeme, en livonio Kurāmō) ye a parti mas occidental de Letonia, que consiste en as ciudatz de Liepāja y Ventspils y os municipios d'Aizpute, Alsunga, Brocēni, Dundaga, Durbe, Grobiņa, Kandava, Kuldīga, Nica, Pāvilosta, Priekulė, Roja, Rucava, Saldus, Skrunda, Talsi, Vaiņode y Ventspils. Curlandia estió a tierra d'o pueblo balto medieval d'os curs.
• Zemgalia (en letón Zemgale) ye a parti central de Letonia. Zemgalia muga con Curlandia a l'ueste, o Golfo de Riga, o Daugava y Livonia a o norte, Selonia a l'este y a muga con Lituania a o sud. Consiste en a ciudat de Jelgava y os municipios d'Auce, Baldone, Bauska, Dobele, Engure, Iecava, Jaunpils, Jelgava, Ozolnieki, Rundale, Tervete, Tukums y Vecumnieki. Zemgalia tamién incluye a parti norte d'o Condau de Šiauliai en Lituania. Zemgalia estió a tierra d'o pueblo balto medieval d'os zemgalians.
  • Selonia (en letón Sēlija, Augšzeme) a sobén se considera una parti de Zemgalia. Selonia comprende a parti oriental d'a provincia de Zemgalia de l'anyo 1939, que corresponde alto u baixo a parti d'os antigos districtos d'Aizkraukles, Daugavpils y Jēkabpils a o sud d'o río Daugava. A Selonia tradicional tamién incluyiba una parti, a o nord-este de Lituania. Leva o nombre d'o pueblo balto medieval d'os selons.
• Livonia (en letón Vidzeme, en livonio Vidūmō), que significa "Tierra meya", tamién se conoixe como Livland, encara que comprende nomás una chicota parti d'a Livland tradicional. L'actual Livonia ye a parti letona d'a Livonia sueca y a Ciudat de Riga. Corresponde alto u baixo a os antigos districtos d'Alūksne, Cēsis, Gulbene, Limbaži, Madona, Valka y Valmiera y partis d'os d'Aizkraukle, Ogre y Riga, situaus a o norte d'o río Daugava.
• Letgalia (en letón Latgale, en letgalián: Latgola), a parti de Livonia encara en mans d'a Confederación de Polonia y Lituania dimpués d'o Tractau d'Altmark en 1629, dita Voivodato d'Inflanty. Alto u baixo corresponde a os districtos de Balvi, Kraslava, Ludza, Preiļi, Rēzekne y partis d'os districtos de Daugavpils y Jēkabpils a o norte d'o río Dvina Occidental. A rechión estió o territorio d'o pueblo balto medieval d'os letgalians, que asimiloron a atros pueblos baltos adintro d'una identidat común letona. A población actual de Letgalia ye formada por letgalians baltos catolicos auctoctonos, polacos, belarrusos y rusos.

En bell caso, Curlandia y Zemgalia se combinan en una rechión. Ixo reflecta a división politica de Letonia entre 1629 y 1917, quan Curlandia y Zemgalia yeran chuntas, por primera vegada como o Ducau de Curlandia y Zemgalia, posteriorment como Gubernación de Curlandia en l'Imperio Ruso, mientres que Livonia y Letgalia yeran politicament independients, tanto de Curlandia como una de l'atra.

Dende ista perspectiva, bi ha tres rechions: Curlandia (incluyindo Zemgalia y Selonia), Livonia y Letgalia. Ista división ya no ye d'uso común, pero se puet veyer en o escudo de Letonia y en o Molimento a la Libertat en Riga; os dos contienen tres estrelas, que perteneixen a Curlandia, Livonia y Letgalia, que s'unioron ta formar Letonia en 1918.

Se veiga tamién

• Districtos de Letonia