Deriva litoral

De Biquipedia
Ir ta: navego, busca
Esquema de deriva litoral.

A deriva litoral ye un proceso de transporte y sedimentación de material costero que intervién en especial en a formación y evolución d'as plachas, sayetas litorals, tombolos y albuferas.

En as plachas se produce un movimiento efectivo d'arena constant en una dirección paralela a la costa como conseqüencia d'ondas marinas que chocan obliquament contra ella. D'esta traza as particlas d'arena son empentatas por as ondas marinas en a superficie d'a placha seguindo a trachectoria d'o frent d'a onda, pero quan a onda retacula, as particlas d'arena no retaculan en ixa dirección y baixan seguindo a linia de més pendient, perpendicular a la linia de costa, quedando en un punto diferent d'a linia de costa. A onda vinient tornará a mover a particla con una trachectoria obliqua respecto a la lina de costa, pa dimpués baixar seguindo a linia de més pendient dica arribar a un punto d'a linia de costa encara més luent de l'orichinal.

Esto fa que quan existe una dirección predominant d'as ondas marinas por a disposición d'a costa u d'os vientos dominants, s'acumule l'arena en bells puestos. Si a costa ye curvilinia u presenta bella irregularidat l'arena puet acumular-se contra ixe salient y dimpués seguir acumulando-se cada vegata més luent d'ixe salient formando una sayeta litoral, estructuras luengas d'arena con disposición paralela a la costa y unidas a un salient de costa por un punto.

Puet desvenir-se que una sayeta una una isleta a la costa y d'esta traza esdeviene como una chicota peninsula conoixita como tombolo. En Peniscola bi n'ha un de muit visible.

Quan o cabo por on creixe una sayeta litoral s'une a atro salient de costa quasi se cierra u se cierra de tot una bahía u golfo, que esdeviene una lacuna con augua salada con condicions especial conoixida como albufera.

Bibliografía[editar | editar código]