Nebulosa planetaria

De Biquipedia
Ir a la navegación Ir a la búsqueda
A nebulosa planetaria NGC 6326 que se troba a 11.000 anyos luz d'a Tierra.

Una nebulosa planetaria ye una nebulosa en un emborbozo brillant en expansión de plasma y gas ionizau, creyada por as estrelas chigantas royas en os zaguers intes d'as suyas vidas.[1]

O nombre se debe a que os suyos descubridors, en o sieglo XVIII,​ observoron que a suya apariencia yera semellant a las planetas chigantas como Chupiter u Saturno vistos a traviés d'os telescopios opticos d'a epoca, encara que realment no tienen garra relación con as planetas. Se tracta d'un fenomeno relativament breu en termins astronomicos, que dura de l'orden d'as decenas de milars d'anyadas; como comparanza o tiempo de vida d'una estrela comuna ronda os diez mil millons d'anyadas.

A la fin d'a vida d'as estrelas que aconsiguen a fase de chiganta roya, as capas exteriors d'a estrela son despelidas a causa de pulsacions y a intensos aires estelars. Dimpués d'a expulsión d'istas capas, subsiste un chicot nuclio d'a estrela, o qual se troba a una gran temperatura y brila de traza intensa. A radiación ultravrioleta emitida por iste nuclio ioniza as capas externas que a estrela heba feito fuera.

As nebulosas planetarias son obchectos de gran importancia en astronomía, a causa que desempenyan un paper crucial en a evolución quimica d'as galaxias, tornando a lo medio interestelar metals pesaus y atros productos d'a nucleosintesi d'as estrelas (como que carbonio, nitrochén, oxichén y calcio). En galaxias leixanas, as nebulosas planetarias son os solos obchectos d'os quals se puede obtener información util sobre a suya composición quimica.

Referencias[editar | modificar o codigo]

  1. (en) Joseph A. Angelo Jr. Encyclopedia of Space and Astronomy, Facts on File, 2006, ISBN 978-0-8160-5330-8, p.463