Lake Tekapo

De Biquipedia
Ir a la navegación Ir a la búsqueda
Lake Tekapo
Localidat de Nueva Zelanda
Lake Tekapo Township South Island.jpg
Lake Tekapo
Estato
 • Rechión
 • Districto
Flag of New Zealand.svg Nueva Zelanda
Canterbury
Mackenzie
Población
 • Total

369 hab. (2013)
Coordenatas
44°00′″S 170°29′″E
Lake Tekapo en Nueva Zelanda
Lake Tekapo
Lake Tekapo
Situación de Lake Tekapo en Nueva Zelanda

Lake Tekapo ye una chicota localidat situada a o sud d'o laco Tekapo en o interior d'a Isla d'o Sud de Nueva Zelanda. Teneba 369 residents seguntes o censo de 2013, estando un d'os cinco lugars habitaus d'a poco habitada compleganza d'o Mackenzie.[1]

A carretera estatal 8 trescruza a localidat de Lake Tekapo, situada a 227 km de Christchurch y 256 km de Queenstown. Bi ha servicios d'autobus diarios que conectan Lake Tekapo con Christchurch y Queenstown. O laco ye un destín turistico popular y por ixo bi ha quantos hotels en a localidat. L'aeropuerto de Lake Tekapo se troba a 5 km a l'ueste d'o lugar. Bi existen vuelos charter operaus por l'aerolinia Air Safaris, que tien a suya base en iste aeropuerto.[2]

Historia[editar | editar código]

Os maorís estioron os primers humans en descubrir a compleganza d'o Mackenzie. O nombre Tekapo deriva d'as parolas maorís taka (colchoneta u alfombra ta dormir) y po (nueit). A compleganza d'o Mackenzie fue descubierta por os europeus en 1855 quan, mirando de trobar una rota menos concurrida, James Mackenzie, un pastor de uellas escocés, se fico tierra aintro y trobó as tierras que hue levan o suyo nombre. En 1857, John y Barbara Hay establioron a primera grancha de uellas en Mackenzie a cantos d'o laco Tekapo.[3]

O lugar de Lake Tekapo prencipio a creixer dimpués d'a construcción d'as centrals hidroelectricas en a decada de 1930. O prochecto se retrasó debiu a la Segunda Guerra Mundial, encara que se remató y prencipió a funcionar en 1951.[3] A Ilesia d'o Buen Pastor se construyió en 1935. Actualment, ubre a o publico de 9:00 a 17:00 en verano (octubre a abril) y de 10:00 a 16:00 d'hibierno (mayo a septiembre). A "Estatua d'o can", adedicada a os cans d'atura de Mackenzie, fue encargada o 7 de marzo de 1968.[1]

Clima[editar | editar código]

Lake Tekapo tien un clima ocianico (clasificación climatica de Köppen: Cfb) con veranos suaus y soleyaus y hibiernos fredos y ixutos. De meya, Lake Tekapo tien 2180 horas anyals de sol (200 horas mas que a meya de Nueva Zelanda) y 78 días de plevia que producen bells 600 mm de precipitacions anyals.[1] A temperatura ye, por un regular, calida en verano y extremadament freda d'hibierno ta os estandars neozelandeses.

Observatorio Universitario de Mount John[editar | editar código]

Debiu a la suya atmosfera clara, a o gran numero de nueitz estreladas y a la relativament poca contaminación luminica, l'Observatorio Universitario de Mount John se troba situau en un chicot tozal a o norte d'ista localidat y a o sud d'o chicot laco Alexandrina. Orichinalment establiu por a Universidat de Pennsylvania (que buscaba un puesto d'observación en o hemisferio sud), actualment ye propiedat d'a Universidat de Canterbury. De 1969 a 1982, as Fuerzas Aerias d'os Estaus Unius teneban una estación de seguimiento de satelites chunto a dito observatorio. En chunio de 2012, un aria de 430.000 ha arredol de Tekapo fue declarada como Reserva Internacional de Ciel Estrelau d'Aoraki Mackenzie por a International Dark-Sky Association, una d'as quatre que existen en tot o mundo.[4]

Base melitar[editar | editar código]

O eixercito de Nueva Zelanda tien una gran zona de maniobras situada en Tekapo. Ha estau emplegada tanto ta entrenamientos melitars chenerals como especificos ta as fuerzas ninviadas a Afganistán.[5]

Referencias[editar | editar código]