Insuficiencia cardiaca

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Simptomas d'a insuficiencia cardiaca (en anglés).

A insuficiencia cardiaca ye un sindrome fisiopatolochico, que resulta de qualsequier trastorno, bien sía estructural u funcional d'o corazón, que cause la incapacidat d'iste de fer plen u pompiar sangre en os volumens adequaus pa satisfer as demandas d'o metabolismo tisular u, si l'aconsigue, lo fa a estachas d'una elevación cronica d'a presión d'empliu ventricular. No ha de trafucar-se con a perda de traquius, lo qual se denomina asistolia, ni con un ature cardiaco, que ye quan a función normal d'o corazón cesa con o subseqüent colapso hemodinamico que conlleva a la muerte. A resultas de que no totz os pacients cursan con sobrecarga de volumen en l'inte de l'avaluación inicial u revaluacions subsiguients, se prefiere lo termin insuficiencia cardiaca per sobre lo mas antiquau termin insuficiencia cardiaca conchestiva.

Con freqüencia, a insuficiencia cardiaca conchestiva se pasa per alto a causa d'a manca d'una definición universalment aprebada y a las dificultatz diagnosticas, en especial si la malotía se considera «lieu». Encara con as millors terapias, a insuficiencia cardiaca ye asociada a una taxa anyal de mortalidat d'un 10 %. Ye la prencipal causa d'hespitalización en personas mayors de 65 anyadas d'edat.