Húsar
 |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo ye sobre una traza de soldato de Caballería; ta atros usos, se veiga Húsar (desambigación).
Un húsar[1] (en hongaro huszár, plural huszárok, en polaco huzar) yera un militar de l'arma de Caballería que existiba d'antis mas en os exercitos. Amanixió en os exercitos d'o sieglo XVII y gosaba fer servir una traza especifica d'uniforme, que consistiba en una imitación d'un vestuache d'orichen hongaro. A suya función yera a de caballería luchera.
L'antecedent mas antigo d'os húsars estió en o Reino d'Hongría mientres o sieglo XV, y en ixas envueltas yeran a forma que preneba a Caballería en l'exercito hongaro. Por as alianzas entre os hongaros y a Republica d'as Dos Nacions, unidaz d'húsars (encara que formatas mas que mas por polacos y lituanos) fuoron emplegatas por l'exercito polaco, y a o suyo traviés dentroron en atros exercitos europeus, que en formoron as suyas propias unidaz, a vegatas composatas basicament por hongaros etnicos.
O suyo uniforme, prou pareixito entre toz os exercitos, teneba una sobrebuena apariencia, mesmo en ixas envueltas cuan os uniformes se caracterizaban por a suya vistosidat. Consistiba en: un morrión de fieltro u colbac, morrión de piel con bolsa u manga colgant d'un costato; dolman, chaqueta corta dica a cintura, u bien, en etapas mas modernas, attila, una chaqueta de meya largaria; pelliza, que gosaba portar-se colgata en o huembro y sostenita d'o cuello con un cordón; bolsa (sabretache) a on amaneixeba o emblema d'a unidat; calzons muit cenyitos; y botas altas; estando a mayor parte d'as piezas ornatas con un nyudo hongaro (en hongaro sújtás), nyudos cordiformes brodatos en oro u en color negra, que se convertioron en un simbolo identitario de tot l'exercito hongaro. Os húsars, amás, gosaban portar unas grans mostaixas y o pelo largo, recollito en una coleta.
O suyo armamento yera d'alcuerdo con as suyas misions militars. Gosaban emplegar-se en misions de reconoiximiento precedindo a la resta d'as tropas, u bien cosirando as suyas alas mientres marchaban, amás d'en misions d'espullamiento d'o territorio enemigo ta reunir alimentos y atros suministros ta as tropas propias. Asinas, en primeras feban servir nomás que o sable d'a Caballería y una lanza, y dimpués tamién feban servir una pistola y una carabina, cuan as armas de fuego adquirioron a suya supremacía en o campo de batalla.
Dimpués d'alto u baixo tres sieglos d'existencia, os húsars desapareixioron con a Primera Guerra Mundial, cuan desapareixió de feito tota a Caballería, en no estar posible o suyo emplego en o campo de batalla por a potencia de fuego que heba adquirito a infantería con l'armamento moderno, mas que mas a metralladora.
Referencias
[editar | modificar o codigo]- ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
