Bayoarios

Os bayoarios enta l'anyo 788

Os bayoarios estioron un pueblo chermanico conoixito dende l'anyo 551. D'orichens poco claros, yera l'agrupación d'unas cuantas tribus que trescurzoron o limes danubián y s'establioron en l'actual Bavera, dende on s'estendilloron enta o sur a traviés d'os Alpes. O etnonimo d'este pueblo chermanico puet remontar-se a l'orichen cheografico en tierras d'os boyos celticos, en l'actual Bohemia. En tot o sieglo IV permaneixioron baixo protectorato merovinchio. Os bayoarios contribuyoron a la colonización chermanica enta o sureste p'aturar os pueblos invasors d'as estepas que periodicament s'establiban en Panonia. Se creyó una marca oriental que esdevinió Austria. A colonización bayoaria contribuyó a crebar a continuidat territorial d'os eslavos. Os bayovarios son os devantpasatos d'os actuals baverans y tamién d'os tiroleses y os austriacos.

Son mencionatos en a traducción herediana de "Historia Langobardorum" de Paolo Diacono:

El rey Liutprando, como huviés regnado .XXXI. anyo et .VII. meses, ya antigo et maduro en edat murió. El su cuerpo fué ssotterado en la yglesia de sant Adrián martir, do fu ensoterrado su padre. Fué hombre de grant savieza, piadoso, iusto et amador de paz, poderoso en batalla, clement a los culpables, casto, de grant oración, almosnero franco et liberal, ynorant letras más nutridor de philósophos et conservador de leyes. Aquesti en el comencamiento del su regno tomó muchos castiellos de los Baioarios, más confiando en orationes et en armas et guardando et conservando todos tiempos con grant cura la paz de los Franceses et de los Ávaros.

Tamién figuran en a "Cronica de los Conquiridors" de Chuan Ferrández d'Heredia, o capítol CXC se titula Como Karles Martel guerreo los Baioarios et los Huncnos et subiugo los Francos y o capítol CXCV Como Karles subiugo a los Longobardos, los Saxones, los Bretones, los Bajoarios et otras muchas nationes.